ინფრასტრუქტურის მინისტრი რევაზ სოხაძე აცხადებს, რომ ინფრასტრუქტურული პრობლემების მოგვარებაზე სამინისტრო ყოველდღიურად მუშაობს და მათზე "მეტად არავინ ნერვიულობს და განიცდის იმ პრობლემებზე, რაც განათლების სექტორშია. მისივე თქმით, N21 სკოლის ავარიულობის შესახებ დასკვნა ლევან სამხარაულის ბიურომ მოამზადა და, კანონით გათვალისწინებული პროცედურების შემდეგ, განათლების სამინისტროს გადაეგზავნა, რომელმაც შესაბამისი გადაწყვეტილება მიიღო.

"აქ ბრალეულობაზე არ არის საუბარი. ლევან სამხარაულის სახელობის სასამართლო ექსპერტიზის ეროვნულმა ბიურომ დადო შესაბამისი დასკვნა და, როგორც კი ის ინფრასტრუქტურის სამინისტროში შემოვიდა, კანონით გათვალისწინებული პროცედურების გავლის შემდეგ, განათლების სამინისტროს გადაეგზავნა. განათლების სამინისტრომ მიიღო ის გადაწყვეტილება, რაც უნდა მიეღო.

...ჩვენზე მეტად არავინ ნერვიულობს და განიცდის იმ პრობლემებზე, რაც არის განათლების სექტორში. ყოველდღიურ რეჟიმში ვმუშაობთ, რომ ინფრასტრუქტურული პრობლემები ამ სფეროში რაც შეიძლება მალე და ოპერატიულად გადაწყდეს.

...ჩვენ ყოველთვის ღიად ვაცხადებთ, სადაც არის პრობლემა. პრობლემებს არ გავურბივართ და არ ვმალავთ – რაც არის პრობლემატური, იმაზეც ღიად ვესაუბრებით საზოგადოებას", — აცხადებს რევაზ სოხაძე (IPN).

განათლების მინისტრი გივი მიქანაძის თქმით, განათლების უწყებამ შენობის ავარიულობაზე სამხარაულის დასკვნა გუშინ, 17 სექტემბერს მიიღო და მათ მხრიდან მყისიერი რეაგირება მოჰყვა. სკოლას ექსპერტიზა ინფრასტრუქტურის სამინისტროს დაკვეთით ჩაუტარდა და აღნიშნული უწყებაა პასუხისმგებელი ამ სკოლის რეაბილიტაციაზე.

შეგახსენებთ, რომ თბილისის N21-ე, ყოფილ მე-6, საჯარო სკოლასთან მოსწავლეები, მშობლები და მასწავლებლები არიან შეკრებილები. ისინი აცხადებენ, რომ 17 სექტემბერს მიიღეს შეტყობინება, რომ ექსპერტიზის დასკვნის საფუძველზე სკოლის შენობა ავარიულია, სწავლა უნდა შეწყდეს და შენობა დაინგრეს.

მშობლების ინფორმაციით, მოსწავლეების სხვადასხვა სკოლასა და ცვლაში გადანაწილება იგეგმება, რის გამოც ისინი გადაწყვეტილების მიზეზების შესახებ განმარტებებს ითხოვენ.