სომხეთის პარლამენტში ყოფილი პრეზიდენტის, რობერტ ქოჩარიანის ოჯახის სავარაუდო უკანონო ქონებაზე გამართული მწვავე განხილვისას, სომხეთის პრემიერმინისტრმა ნიკოლ ფაშინიანმა განაცხადა, რომ ხელისუფლება უკანონოდ შეძენილ "ფეხსაცმელსაც კი" დაიბრუნებდა.

როგორც OC Media წერს, ქოჩარიანის უმცროსმა ვაჟმა, ლევონმა, საპასუხოდ პრემიერისთვის საკუთარი ფეხსაცმლის გაგზავნა შესთავაზა.

განცხადებები პარლამენტში კითხვა-პასუხის დროს, მას შემდეგ გაკეთდა, რაც ქოჩარიანის ხელმძღვანელობით მოქმედი ფრაქციის, სომხეთის ალიანსის, დეპუტატებმა ფაშინიანი ქოჩარიანის დაკავების გამო გააკრიტიკეს. როგორც გამოცემა წერს, ეს პირველი შემთხვევა არ არის, როდესაც სომხეთის პრემიერმინისტრმა ოპოზიციისთვის ფეხსაცმლის ჩამორთმევაზე ისაუბრა.

ქოჩარიანი და მისი უფროსი ვაჟი, სედრაკი, სხვებთან ერთად, აგვისტოს ბოლოდან წინასწარ პატიმრობაში იმყოფებიან. მათ ბრალი ოჯახის ქონებასთან დაკავშირებულ საქმეზე აქვთ წარდგენილი.

ქოჩარიანების დაკავება სომხეთში ყოფილი მაღალჩინოსნების დაკავებების სერიის ნაწილია, რომელიც ივნისის საპარლამენტო არჩევნების შემდეგ დაიწყო.

ოთხშაბათს კრიტიკის საპასუხოდ ფაშინიანმა ქოჩარიანისა და მისი უფროსი ვაჟის წინააღმდეგ წარდგენილ ბრალდებებზე ისაუბრა და განაცხადა, რომ მათ, ვინც ფიქრობს, რომ ოჯახის ქონება, რომლის ღირებულებაც მისი თქმით, "რამდენიმე ასეულ მილიონ დოლარს" შეადგენს, კანონიერად არის შეძენილი, შეუძლიათ ქუჩაში გამოვიდნენ და რევოლუცია მოაწყონ.

"ჩვენი პოლიტიკური ნებაა, რომ თუ რობერტ ქოჩარიანისა და მისი ოჯახის კუთვნილი თუნდაც ერთი ფეხსაცმელი უკანონოდ არის შეძენილი, ის სომხეთის რესპუბლიკის საკუთრებაში დავაბრუნოთ", — განაცხადა ფაშინიანმა.

მოგვიანებით ფაშინიანსა და ლევონ ქოჩარიანს შორის სიტყვიერი დაპირისპირება კვლავ გაგრძელდა.

ფაშინიანმა, სავარაუდოდ, ქოჩარიანზე საუბრისას, იკითხა, როგორ იყო შესაძლებელი, რომ ადამიანი, რომელიც ქვეყანას ათი წლის განმავლობაში ხელმძღვანელობდა, მილიონერი გამხდარიყო. მან ასევე იკითხა, რატომ არ არის თავად მილიონერი პრემიერმინისტრის თანამდებობაზე რვა წლის ყოფნის შემდეგ.

"ანუ თქვენ ჭკვიანი ხართ, ჩვენ კი არც ისე ჭკვიანები?" — მიმართა ფაშინიანმა ქოჩარიანს.

ქოჩარიანმა ადგილიდან უპასუხა. მისი პასუხი პირდაპირ ეთერში მკაფიოდ არ ისმოდა, თუმცა, როგორც ჩანს, მან დადებითად უპასუხა.

"ამბობს, დიახო. მალე ვნახავთ, ვინ არის ჭკვიანი. ასე უქნიეთ თავი ერთმანეთს — ბოლო წყვილ ფეხსაცმელსაც წაგართმევთ", — თქვა ფაშინიანმა.

"ახლავე გამოგიგზავნოთ?" — უპასუხა ქოჩარიანმა.

"ნუ გამოგზავნით. გაგხდით", — უთხრა ფაშინიანმა.