დღეს, 18 სექტემბერს რუსეთში სახელმწიფო დუმის დეპუტატების არჩევნები დაიწყო. ამის შესახებ ინფორმაციას რუსული მედია ავრცელებს.

არჩევნები სამი დღის განმავლობაში, 18-დან 20 სექტემბრის ჩათვლით გაიმართება. რუსეთის მოქალაქეები 20 700 დეპუტატსა და ადმინისტრაციის ხელმძღვანელს აირჩევენ.

ხმის მიცემა შესაძლებელია ტრადიციული წესით, ქაღალდის ბიულეტენის გამოყენებით, ასევე დისტანციურად. დისტანციური ელექტრონული კენჭისყრა 33 რეგიონშიც ტარდება. ცენტრალური საარჩევნო კომისიის ხელმძღვანელის, ელა პამფილოვას უახლესი მონაცემებით, ამ გზით ხმის მიცემას 4 მილიონზე მეტი ამომრჩეველი გეგმავს.

როგორც რუსული მედია წერს, ხმის მიცემის ორგანიზების განსაკუთრებული მიდგომები მოქმედებს "რუსეთის ახალ ტერიტორიებსა და რთული ოპერატიული ვითარების მქონე რვავე რეგიონში". საზღვარგარეთ მყოფი რუსებიც შეძლებენ სახელმწიფო დუმის არჩევნებში მონაწილეობის მიღებას. საზღვარგარეთ სულ 152 ქვეყანაში 333 საარჩევნო უბანი იმოქმედებს.

აღსანიშნავია, რომ 30 აგვისტოდან 37 რეგიონში ვადამდელი კენჭისყრა მიმდინარეობდა. 16 სექტემბრის მდგომარეობით, ხმა უკვე მისცა 203 952-მა ამომრჩეველმა, მათ შორის 14 000-ზე მეტმა ადამიანმა საზღვარგარეთიდან.

მეცხრე მოწვევის სახელმწიფო დუმის დეპუტატობის არჩევნებში ფედერალურ საარჩევნო ოლქში ათი პარტია მონაწილეობს.