რუსეთის უშიშროების საბჭოს მდივანი სერგეი შოიგუ პარლამენტის თავმჯდომარეს, შალვა პაპუაშვილს ციტირებს და აცხადებს, რომ "პაპუაშვილმა ნათლად და საღად განაცხადა, რომ "შესაძლოა, რუსეთთან ესკალაცია გერმანიის ან ლიეტუვის ინტერესებში შედიოდეს, მაგრამ არა საქართველოს ინტერესებში". შოიგუს კომენტარებს რუსული სამთავრობო მედია TASS ავრცელებს.

მისი თქმით, "დასავლელი აქტორები ღიად და უხეშად ცდილობენ პოლიტიკურ ვითარებაში ჩარევას. ამის დანახვა ამიერკავკასიაში შეგვიძლია არა მხოლოდ სომხეთის, არამედ საქართველოს მაგალითზეც".

უშიშროების საბჭოს მდივანმა გამოთქვა რწმენა, რომ "სახელმწიფოებს შორის გადაუჭრელი წინააღმდეგობები არ არსებობს, ხოლო როდესაც უთანხმოება ჩნდება, დაუყოვნებლივ უნდა შეფასდეს, ვის აძლევს ხელს მეზობელი ხალხებისა და სახელმწიფოების დაპირისპირება".

"როგორც წესი, ამის უკან დასავლელი აქტორები დგანან, რომლებიც დაინტერესებული არიან შეინარჩუნონ კონტროლი ეკონომიკის მომგებიან სექტორებზე, სატრანსპორტო-ლოგისტიკურ დერეფნებსა და რესურსებზე", — აცხადებს შოიგუ.

სერგეი შოიგუ 2008 წლის ომის დროს რუსეთის საგანგებო სიტუაციების მინისტრი იყო, 2012 წლის ნოემბერში თავდაცვის მინისტრი გახდა, 2024 წლიდან კი რუსეთის უშიშროების საბჭოს მდივანია. 2025 წლის ნოემბერში მან საჯაროდ შეაქო ქართული ოცნების ხელისუფლების "მდგრადობა", რითაც კიდევ ერთხელ გახდა ქართული პოლიტიკური დღის წესრიგის ნაწილი.

შეგახსენებთ, რომ მიმდინარე წლის 9 სექტემბერს შალვა პაპუაშვილმა ჟურნალისტებს განუცხადა, რომ "რუსეთთან ესკალაცია ჩვენი ქვეყნის ეროვნულ ინტერესებში არ არის. შეიძლება, ეს იყოს გერმანიის თუ ლიეტუვის ინტერესებში, რომ საქართველო ესკალაციაში შევიდეს რუსეთთან, ბოდიში ყველასთან, მაგრამ მათ ინტერესებს ჩვენი ინტერესები სჯობს", — განაცხადა პაპუაშვილმა.