აშშ-სგან სანქცირებული რუსი მილიარდერი კონსტანტინ მალოფეევი, რომელიც უკრაინაში პრორუსი სეპარატისტების დაფინანსებასა და მხარდაჭერაშია მხილებული აცხადებს, რომ ირაკლი კობახიძის განცხადება "რუსოფობიის საფუძვლიანად აღმოფხვრასთან დაკავშირებით, ყველაზე სასიამოვნო და გონივრული სიტყვებია, რომლებიც XXI საუკუნეში თბილისიდან გაჟღერებულა". მისივე თქმით, საქართველო სომხეთისგან განსხვავებით "პოლიტიკურ რეალიზმს ირჩევს და სწორედ ეს არის სახელმწიფოებრივი სიბრძნე".

"საქართველოს პრემიერმინისტრმა ირაკლი კობახიძემ განაცხადა, რომ "რუსოფობიის საფუძვლიანად აღმოფხვრას" აპირებს. ეს ყველაზე სასიამოვნო და გონივრული სიტყვებია, რომლებიც XXI საუკუნეში თბილისიდან გაჟღერებულა.

ამ დროს, როდესაც მეზობელი სომხეთი საკუთარ თავს ღალატობს, საქართველო პოლიტიკურ რეალიზმს ირჩევს. სწორედ ეს არის სახელმწიფოებრივი სიბრძნე.

ისტორია ციკლურია. XVIII საუკუნის ბოლოს დღევანდელი ქართველი პრემიერმინისტრის დიდმა მოსახელე — მეფე ერეკლე II-მ — გეორგიევსკის ტრაქტატი გააფორმა. ქართველმა პატრიოტებმა საკუთარი მიწა და მისი უძველესი, ღვთისმოშიში ხალხი ფიზიკური განადგურებისგან იხსნეს და ერთადერთი სწორი არჩევანი გააკეთეს.
დიახ, რუსეთსა და საქართველოს შორის იყო და კვლავაც არსებობს რთული პოსტსაბჭოთა უთანხმოებები. მაგრამ თავად ღმერთმა განსაზღვრა, რომ ჩვენს ხალხებს ერთად ეარსებათ. ჩვენ გვაერთიანებს წმინდა მართლმადიდებლობა და ორსაუკუნოვანი კავშირი.
დღეს, ისევე როგორც საუკუნენახევრის წინ, ჩვენ საერთო მტერი გვყავს. ამჯერად ეს არის გლობალისტური დასავლეთი, რომელსაც ჩვენი ხალხების საერთო რწმენის, ტრადიციებისა და იდენტობის დანგრევა მოაქვს. ძმური კეთილმეზობლური ურთიერთობების აღდგენა საქართველოსა და რუსეთისთვის ერთადერთი სწორი გზაა — გზა, რომელიც მეფე ერეკლე II-მ და სრულიად საქართველოს კათოლიკოს-პატრიარქმა, საქართველოს ეკლესიის მიერ მარადიულად ხსენებულმა ილია II-მ დაგვიტოვეს”, — წერს მალოფეები ტელეგრამზე.

შეგახსენებთ, რომ ტერმინი "რუსოფობია" ირაკლი კობახიძემ 4 აგვისტოს სოციალურ ქსელში გამოქვეყნებულ ვრცელ პოსტში ახსენა. კობახიძის მტკიცებით, ქართულმა აგენტურამ რადიკალური ანტირუსული განწყობა მხოლოდ მას შემდეგ ჩამოიყალიბა, რაც რუსეთი უკრაინაში მეორედ შეიჭრა.

კობახიძემ აღნიშნულ თემას ცალკე ბრიფინგიც დაუთმო, სადაც განაცხადა, რომ "არ უნდა დავუშვათ, გლობალური ომის პარტიის და რუსეთთან მეორე ფრონტის გახსნის გეგმა ხალხთა შორის მტრობის საფუძველი გახდეს". პრემიერმა ხაზი გაუსვა იმ გარემოებას, რომ საქართველოსა და რუსეთში უამრავი შერეული ოჯახი ცხოვრობს, ასევე დიდია ქართული დიასპორა რუსეთში და რუსული წარმოშობის მოსახლეობა საქართველოში, რის გამოც განსაკუთრებული სიფრთხილეა საჭირო.