ევროკავშირი მალე წარადგენს სამოქმედო გეგმას იმ კანდიდატი ქვეყნებისთვის, რომლებმაც ევროპული ინტეგრაციის პროცესში ყველაზე მეტ პროგრესს მიაღწიეს. ამის შესახებ ევროკომისიის პრეზიდენტმა ურსულა ფონ დერ ლაიენმა 16 სექტემბერს, სტრასბურგში, ყოველწლიური მოხსენების — "ევროკავშირის მდგომარეობის შესახებ" მიმართვისას განაცხადა. ევროკომისიის პრეზიდენტს ამ კონტექსტში საქართველო არ უხსენებია.

ფონ დერ ლაიენს მომავალი დოკუმენტების შინაარსი არ დაუკონკრეტებია, მაგრამ ხაზი გაუსვა, რომ ევროკავშირში გაწევრიანების წესები არ შეიცვლება: თითოეული ქვეყანა კვლავ საკუთარი პროგრესისა და დამსახურების მიხედვით შეფასდება, ხოლო ევროპული ღირებულებების დაცვა გაწევრიანების აუცილებელ პირობად დარჩება.

"ჩვენ რწმენა უნდა შევქმნათ იმისა, რომ ევროპელები, ერთმანეთს გვერდით ყოველთვის დავუდგებით. საკმარისია ჩვენს საზღვრებს მიღმა გავიხედოთ და დავინახავთ, რომ ეს ევროპული იდეა ჯერ კიდევ ცოცხალია. საკმარისია, უკრაინასა და მოლდოვას შევხედოთ. შევხედოთ დასავლეთ ბალკანეთს. საკმარისია ყველა იმ ქვეყანას შევხედოთ, რომლებიც ჩვენს კავშირთან ახლოს არიან და რადგან მათი მომავალი ჩვენს კავშირშია, ჩვენ მალე წარვადგენთ სამოქმედო გეგმებს იმ კანდიდატი ქვეყნებისთვის, რომლებმაც ყველაზე მეტ პროგრესს მიაღწიეს", – განაცხადა ურსულა ფონ დერ ლაიენმა.

2026 წლის ივნისში ევროკავშირის წევრმა ქვეყნებმა შეთანხმდნენ, რომ უკრაინასა და მოლდოვასთან გაწევრიანების მოლაპარაკებების პირველი კლასტერი გაიხსნებოდა. ევროკომისიამ ამას გაფართოების პროცესში მნიშვნელოვანი ნაბიჯი უწოდა.

საქართველოსთან დაკავშირებით ევროკავშირის პოზიცია მკვეთრად განსხვავებულია. ევროკომისიის ოფიციალურ გვერდზე წერია, რომ ევროპულმა საბჭომ საქართველოს გაწევრიანების პროცესი "დე ფაქტო შეჩერდა". ევროკავშირი ამასთან აცხადებს, რომ მზად არის მხარი დაუჭიროს ქართველი ხალხის ევროპულ მისწრაფებებს, თუ ხელისუფლება არსებულ კურსს შეცვლის.

2026 წლის ივნისში ევროპარლამენტმა განაცხადა, რომ საქართველოსთან ევროკავშირის შემდგომი ჩართულობა უნდა იყოს დამოკიდებული იმაზე, შეცვლის თუ არა ხელისუფლება მის მიერ შეფასებულ "ანტიევროპულ კურსს" და განახორციელებს თუ არა დემოკრატიულ რეფორმებს.