საქართველოს მე-5 პრეზიდენტმა, სალომე ზურაბიშვილმა ფეისბუქ-ლაივში კულტურის სამინისტროში თანხების შესაძლო არამიზნობრივ ხარჯვაზე ისაუბრა. ის კონკრეტული მტკიცებულებების გარეშე დეტალებზე საუბარს თავს არიდებს, თუმცა კითხვებს სვამს პატრიარქის დაკრძალვასთან დაკავშირებულ ხარჯებზე და იმ კონტრაქტორების სიაზე, რომლებმაც თანხის მიღებაზე უარი თქვეს. ასევე ითხოვს განმარტებებს თიკა რუხაძის მიერ მოსწავლე-ახალგაზრდობის ეროვნული სასახლის აღდგენაზე დახარჯულ თანხებსა და იქ მიმდინარე საქმიანობაზე.

"კულტურის სამინისტრო ჩართულია ფულის გათეთრებასა და ფულის კეთებაში, როგორც სხვა ყველა სამინისტრო. მე დეტალებზე ვერ ვილაპარაკებ, რადგან არ მაქვს დოკუმენტები, თუ რა გაკეთდა პატრიარქის დაკრძალვის დროს და რა არ გაკეთდა. მე მაინტერესებს, თუ ამდენი ადამიანი და კონტრაქტორები იყვნენ, ვინც უარი თქვეს, რომ მიეღოთ თანხები, რაც ძალიან კარგი საქციელია, რატომ არ ქვეყნდება მათი სია. აგვიხსნან, მაშინ სად დაიხარჯა ის თანხები. რაც შეეხება თიკა რუხაძეს, მან ალბათ პიონერთა სასახლის ანგარიშები ვინმეს უნდა ჩააბაროს ბოლოსდაბოლოს, რომელიც ნახევრად გაკეთებულია, ცუდად აღდგენილი — რამდენი დაიხარჯა ამისთვის არ უნდა იცოდეს საზოგადოებამ? რამდენი დაიხარჯა იმისთვის, რომ იქ კერძო ქორწილები ტარდებოდეს და რა ტარდება პიონერთა სასახლეში დღეს, ჩემთვის ცოტა გაუგებარია.

რაც ეხება არაჩვეულებრივ ეზოს, სადაც გამოცხადდა სწორედ დამოუკიდებლობა საქართველოს და ეს მთლიანად კომპლექსი ამ ისტორიის მატარებელია, ის სანაგვედ არის გადაქცეული. ეს ყველაფერი ასევე არის გასარკვევი. თუ გვინდა, რომ ბოლომდე გავარკვიოთ საკითხები, გავარკვიოთ", — ამბობს ზურაბიშვილი.

შეგახსენებთ, რომ თინათინ (თიკა) რუხაძემ კულტურის მინისტრის პოსტი 2026 წლის 28 ივლისს დატოვა. ის ამ პოსტზე 2024 წლის 18 ოქტომბერს თეა წულუკიანი შეცვალა. გადადგომის მიზეზად რუხაძემ ჯანმრთელობის მდგომარეობა დაასახელა. მის შემდეგ მინისტრის მოვალეობას მიხეილ კიკნაძე ასრულებდა. 15 სექტემბერს პრემიერმა ირაკლი კობახიძემ კულტურის მინისტრად მაია ბითაძე დანიშნა.