ოკუპირებულ ცხინვალის რეგიონში ე.წ. რიგგარეშე საპრეზიდენტო არჩევნები მიმდინარეობს. ამის შესახებ ინფორმაციას რუსული მედია ავრცელებს. მთელ რეგიონში 70 საარჩევნო უბანია მომზადებული, რუსეთში კი — ხუთი. ე.წ. რესპუბლიკის მცხოვრებლები არჩევანს ოთხ კანდიდატს შორის გააკეთებენ: ესენი არიან დე ფაქტო მოქმედი პრეზიდენტი მარატ კამბოლოვი, პოლიტიკური პარტია "ერთობის" ლიდერი ზურაბ კოკოევი და ძალოვანი უწყებების წარმომადგენლები მურატ ვალიევი და ყაზბეკ კოდოევი.

ოკუპირებული ცხინვალის ე.წ. პარლამენტმა ე.წ. რიგგარეშე საპრეზიდენტო არჩევნები 1-ელ ივლისს ჩანიშნა. ეს მას შემდეგ მოხდა, რაც 23 ივნისს ე.წ. პრეზიდენტმა ალან გაგლოევმა თანამდებობიდან გადადგომის შესახებ განაცხადა. ამის შემდეგ კრემლმა გამოაქვეყნა რუსეთის პრეზიდენტის ვლადიმერ პუტინის ბრძანებულება, რომლითაც გაგლოევი რუსეთის პრეზიდენტის მრჩევლად დაინიშნა. ე.წ. რესპუბლიკის "კონსტიტუციის" თანახმად, პრეზიდენტის მოვალეობის შესრულება დე ფაქტო პრემიერმინისტრ მარატ კამბოლოვს დაეკისრა.

13 პოლიტიკური პარტიიდან, რომლებსაც ე.წ. პრეზიდენტობის კანდიდატების წარდგენის უფლება აქვთ, კომუნისტურმა პარტიამ, "ერთიანმა ოსეთმა" და "ნიხასმა" გაავრცელეს განცხადება, რომლითაც მხარი დაუჭირეს კამბოლოვის კანდიდატურას.

ე.წ. კონსტიტუციის თანახმად, ე.წ საპრეზიდენტო არჩევნებში მონაწილეობის მისაღებად "მოქალაქე" უნდა იყოს მინიმუმ 35 წლის, ფლობდეს ოფიციალურ ენებს (ოსურსა და რუსულს) და რეგისტრაციამდე ოკუპირებულ რეგიონში მუდმივად 10-წლიანი ცხოვრება უნდა უფიქსირდებოდეს. ამ პერიოდში ასევე ითვლება რუსეთის ფედერაციაში მუდმივი ცხოვრების პერიოდებიც, იმ პირობით, რომ ამ პერიოდებში ისინი რუსეთში სახელმწიფო ან მუნიციპალურ თანამდებობებს იკავებდნენ.