განათლების მინისტრი გივი მიქანაძე თბილისის 21-ე საჯარო სკოლის დანგრევის საკითხს ეხმაურება.

მიქანაძის ვერსიით, განათლების უწყებამ შენობის ავარიულობაზე სამხარაულის დასკვნა გუშინ, 17 სექტემბერს მიიღო და მათ მხრიდან მყისიერი რეაგირება მოჰყვა. სკოლას ექსპერტიზა ინფრასტრუქტურის სამინისტროს დაკვეთით ჩაუტარდა და აღნიშნული უწყებაა პასუხისმგებელი ამ სკოლის რეაბილიტაციაზე.

მინისტრის განცხადებით, გადაწყვეტილება უალტერნატივოა და "ვერც ერთი ბავშვის და პედაგოგის სიცოცხლეს რისკის ქვეშ ვერ დააყენებენ".

"21-ე სკოლასთან დაკავშირებით სიტუაცია არის შემდეგი: პირველ რიგში გეტყვით, რომ ინფრასტრუქტურის სამინისტროს დაკვეთით, სამხარაულის ეროვნული ექსპერტიზა მუშაობს სარეაბილიტაციო სკოლებთან დაკავშირებით კონკრეტული დასკვნების მომზადებაზე.

ჩვენ სამინისტროში ეს დასკვნა მივიღეთ გუშინ დღის მეორე ნახევარში, რის საფუძველზეც სწორედ მყისიერი გადაწყვეტილება იქნა მიღებული, გამომდინარე იქიდან, რომ ეს არის ბავშვების და სასკოლო პერსონალის, მასწავლებლების, ადმინისტრაციის უსაფრთხოებიდან გამომდინარე.

ეს არის უალტერნატივო გადაწყვეტილება, იმიტომ, რომ ჩვენ ვერცერთი ბავშვის, ვერცერთი პედაგოგის, ვერცერთი იქ დასაქმებული ადამიანის ჯანმრთელობას და სიცოცხლეს რისკის ქვეშ ვერ დავაყენებთ," — განაცხადა მიქანაძემ.

ჟურნალისტების განმეორებით კითხვაზე, თუ რატომ გადაწყდა სკოლის რეაბილიტაცია სწავლის დაწყებიდან მეორე დღეს, მიქანაძემ კვლავ გაიმეორა, რომ განათლების სამინისტრო ექსპერტიზის დასკვნას ელოდებოდა. მინისტრის განცხადებით, სწავლის უწყვეტობა სრულიად უზრუნველყოფილი იქნება.

"კიდევ ერთხელ გეუბნებით, გუშინ შემოვიდა დასკვნა, ჩვენი მხრიდან იყო მყისიერი რეაგირება და მიუხედავად იმისა, რომ ეს პროცესი ამ სკოლაში ვერ გაგრძელდება, სწავლის უწყვეტობა იქნება სრულად უზრუნველყოფილი.

ჩვენ უახლოეს დღეებში შევთავაზებთ კონკრეტულ გეგმას, თუ სხვა ალტერნატიულ სივრცეში სკოლა როგორ გააგრძელებს ფუნქციონირებას. მაგრამ გეტყვით, რომ სწავლის უწყვეტობა იქნება უზრუნველყოფილი და ჩვენ გავაკეთებთ მაქსიმალურად ყველაფერს, რომ ეს პროცესი ჩვეულებრივ კონტექსტში განახლდეს.

ამავდროულად, ინფრასტრუქტურის სამინისტრო უახლოეს დღეებში განახორციელებს და წარადგენს კონკრეტულ გეგმას, თუ როგორ განხორციელდება 21-ე სკოლის ინფრასტრუქტურასთან დაკავშირებული საკითხი.

ხაზგასმით ვამბობ და ეს შეგიძლიათ ძალიან მარტივად გადაამოწმოთ: 17 სექტემბერს შემოვიდა დასკვნა ოფიციალურად სამინისტროში და მყისიერად მთელმა გუნდმა იმუშავა იმისთვის, რომ მიგვეღო გადაწყვეტილება. გადაწყვეტილება არის ერთი: უალტერნატივოა, რომ ვერავის სიცოცხლეს და ჯანმრთელობას რისკის ქვეშ ვერ დავაყენებთ," — განაცხადა მიქანაძემ.

დღეს დილიდან, თბილისის 21-ე საჯარო სკოლასთან მშობლები, მოსწავლეები და მასწავლებლები საპროტესტო აქციას მართავენ. ისინი აცხადებენ, რომ სასწავლო პროცესის შეჩერების შესახებ ინფორმაცია გუშინ საღამოს მიიღეს.