თუ ვინმემ სიდნეის ოპერის თეატრის სახურავზე ბეტმენი შენიშნა, ალბათ იფიქრა, რომ სიზმარში იყო. სინამდვილეში, ეს ბეტმენის დღის აღსანიშნავად დადგმული პერფორმანსი იყო… და არა, ბეტმენი 2-ის გადაღებებზე მყოფი რობერტ პატინსონი არ ყოფილა.

ოპერის თეატრის თავზე მდგარი ბეტმენი ჯერ მხოლოდ რეპეტიციაში მონაწილეობდა, ბნელი რაინდის ეროვნული დღე კი 19 სექტემბერს, საღამოს 6 საათზე გაიმართება.

DC ყოველწლიურად, სექტემბრის მესამე შაბათს, ბეტმენის ეროვნულ დღეს აღნიშნავს. ღონისძიებები მთელ მსოფლიოში იმართება — ბეტმენის შესახებ გადაღებული ფილმების სპეციალური ჩვენებებიდან დაწყებული, კომიქსების მაღაზიებში უფასო საჩუქრების დარიგებით დამთავრებული. წელს გოთემ-სითის მცველი 87 წლის ხდება.

რაც შეეხება ბეტმენის ფილმს, მისი გადაღებები ამჟამად ლონდონში მიმდინარეობს, პრემიერა კი 2028 წლის თებერვალშია დაგეგმილი.

ფოტო: EW

პატინსონმა განაცხადა: "წლის ბოლომდე ლონდონში ვარ და ბეტმენის მეორე ნაწილზე ვმუშაობ. კარგია, მაგრამ ჩხუბის სცენების გადაღებისას ნამდვილად ვგრძნობ, რომ ასაკი მეწევა. ვფიქრობ ხოლმე: 'ღმერთო ჩემო, ეს ბევრად უფრო რთულია, ვიდრე ადრე იყო.' თუმცა, ძალიან მხიარული პროცესია და მგონია, რომ ფილმიც საკმაოდ კარგი გამოვა".