ე.წ. ჩორჩანას საქმეზე, თბილისის საქალაქო სასამართლოში, ყოფილი პრემიერმინისტრი მამუკა ბახტაძე იკითხება. IPN-ის ცნობით, ბახტაძე საქართველოში არ იმყოფება, რის გამოც, ის სასამართლოს დისტანციურად ერთვება. მას ჩვენებაც გამოძიების ეტაპზე მსგავს რეჟიმში აქვს მიცემული.

სასამართლოში იმჟამინდელი ეროვნული უსაფრთხოების საბჭოს წევრების დაკითხვაც იგეგმება, რომელთა შორის, არიან ვახტანგ გომელაური და ლევან იზორია.

ყოფილი პრემიერმინისტრისა და შსს-ს ექს-ხელმძღვანელის, გიორგი გახარიას წინააღმდეგ სისხლის სამართლის დევნა 2025 წლის ნოემბერში დაიწყო — ბრალდება ორ ეპიზოდს მოიცავს: 2019 წლის 20-21 ივნისის მოვლენებს („გავრილოვის ღამე") და ე.წ. ჩორჩანას საგუშაგოს საქმეს.

პროკურატურის ვერსიით, გახარიამ შსს მინისტრობისას, ხაშურთან, სოფელ ჩორჩანასთან, საოკუპაციო ხაზის სიახლოვეს არასანქცირებულად განალაგა საგუშაგო, რასაც ტერიტორიის დაკარგვა/რუსული ბორდერიზაცია მოჰყვა. ბრალდების ვერსიით, ეს ეხება ქვეყნის ტერიტორიული მთლიანობის დარღვევასა და ოკუპაციაში დახმარებას.

გენერალური პროკურორის, გიორგი გვარაკიძის განცხადებით, გახარიას ორივე ეპიზოდისთვის ჯამში 13 წლამდე პატიმრობა ემუქრება. სასამართლომ მას აღკვეთის ღონისძიების სახით პატიმრობა შეუფარდა.

გახარიას დაცვა საქმეს პოლიტიკურად მოტივირებულად აფასებს და აცხადებს, რომ ობიექტური განხილვის პირობებში ბრალდება არ დადასტურდება. საქმეს გრიფი ადევს, რის გამოც ადვოკატები დეტალების საჯაროდ გაცხადებას ერიდებიან.

2026 წლის თებერვალში ჩორჩანას ეპიზოდზე უკვე ჩატარდა წინასასამართლო სხდომა — პროცესი ამჟამად მიმდინარეობს.

მამუკა ბახტაძე საქართველოს პრემიერმინისტრი 2018 წლის 20 ივნისიდან 2019 წლის სექტემბრამდე, დაახლოებით 1.5 წელი იყო. ის ქართული ოცნების მმართველობის მეოთხე პრემიერი გახდა, გიორგი კვირიკაშვილის შემდეგ. გადადგომისას ბახტაძემ ოფიციალურ განცხადებაში დაწერა: "განვითარების სტრატეგიული ჩარჩო შექმნილია, დანერგილია და შესაბამისად, მივიღე გადაწყვეტილება თანამდებობის დატოვების შესახებ, რადგან ვთვლი, რომ ჩემი მისია ამ ეტაპისათვის შევასრულე".