აშშ-ის პრეზიდენტმა დონალდ ტრამპმა თეთრ სახლში სომეხ რელიგიურ ლიდერებს უმასპინძლა. ღონისძიება ტრამპის ადმინისტრაციის რელიგიის ოფისისა და სომხეთის საელჩოს ორგანიზებით გაიმართა. ინფორმაციას OC media ავრცელებს.

შეხვედრას ჩრდილოეთ ამერიკის ეპარქიების სომხური რელიგიური ლიდერები და აშშ-ში სომხეთის ელჩი ნარეკ მკრტჩიანი ესწრებოდნენ. როგორც გამოცემა წერს, სასულიერო პირებმა ერთობლივი ლოცვა აღავლინეს.

შეხვედრა აშშ-სა და სომხეთს შორის ურთიერთობების გაძლიერების ფონზე შედგა, მათ შორის იმ პერსონალური კავშირის გათვალისწინებით, რომელიც ტრამპმა პრემიერმინისტრ ნიკოლ ფაშინიანთან დაამყარა.

"შეხვედრისას აზრები გაცვალეს სომხეთსა და შეერთებულ შტატებს შორის ურთიერთობებზე, ორ ხალხს შორის არსებულ ქრისტიანულ თემზე — ცივილიზაციურ კავშირებზე, რელიგიურ თავისუფლებებზე, ასევე მშვიდობისა და სტაბილურობის დამყარებისკენ მიმართულ ძალისხმევაზე. ხაზი გაესვა ხალხებს შორის მშვიდობის დამყარებისა და ურთიერთგაგების განმტკიცების აუცილებლობას, რასთან დაკავშირებითაც აღინიშნა რწმენისა და სულიერი ფასეულობების მნიშვნელობა ამ პროცესში.

თავიანთ ლოცვაში სულიერმა ლიდერებმა ასევე ყურადღება გაამახვილეს მშვიდობის დამყარებისკენ მიმართულ ძალისხმევაზე და ხაზი გაუსვეს აშშ-ის პრეზიდენტის, დონალდ ტრამპის წვლილს სომხეთში დამყარებულ სამშვიდობო პროცესში", — დაწერა სომხეთის საელჩომ აშშ-ში.