გველესიანმა "ჯეო თიმის" გადაცემაში განაცხადა, რომ პროევროპული აქციების დროს ნაკრების ფეხბურთელებზე "სხვადასხვა ძალებიდან" წნეხი იყო და "პოზიციის დაფიქსირებას აიძულებდნენ".

პაპუაშვილის თქმით, გველესიანის განცხადებაზე უარყოფითი კომენტარები მეტყველებს იმაზე, რომ სპორტსმენებსა და კულტურის წარმომადგენლებზე ნამდვილად წნეხი იყო.

"გველესიანმა თქვა ის, რისი მოწმეც ყველანი ვართ, რომ მაშინ ყველაზე, მათ შორის სპორტსმენებსა და კულტურის წარმომადგენლებზე, იყო წნეხი — წნეხი იმისა, რომ ყველას აუცილებლად გამოეთქვა თანაგრძნობა იმ ძალების მიმართ, რომლებიც საქართველოს ემტერებოდნენ.

ახლა ამაში რა არის ახალი? ნუთუ ვერ ვხედავდით, რა ხდებოდა Facebook-ისა თუ სხვა სოციალური მედიის გვერდებზე, როგორი შევარდნები და იძულება იყო, რომ აუცილებლად დაედოთ პოსტი და ესა თუ ის პოზიცია დაეფიქსირებინათ? ამ ადამიანმაც სწორედ ეს თქვა, რომ იყო წნეხი.

ამის საპასუხოდ კი რა ვნახეთ? რით უარყო ეს ბრალდება იმ ძალამ, რომელიც მაშინ ამ წნეხს ახორციელებდა? ისევ და ისევ წნეხით," — განაცხადა პაპუაშვილმა.

ამავე ბრიფინგზე პაპუაშვილმა რუსთაველის გამზირზე გამართული აქციის მონაწილეებს ფსევდორელიგიური სექტა უწოდა.

"ბაბლს" რომ უწოდებენ საკუთარ თავს ხანდახან, სინამდვილეში ეს ტერმინი შემოტანილია იმისთვის, რომ შეალამაზონ ამ ერთობის არსი, რადგან ეს, სინამდვილეში, ფსევდორელიგიური სექტაა.

ჩვენ თუ დავაკვირდებით ამ ხალხის ქცევას, ეს არის, ერთი ერთში, ფსევდორელიგიური სექტა — ყველაფრით. თავისი რიტუალები აქვთ და ყოველდღე ვხედავთ, რუსთაველის გამზირზე მოდიან იმისთვის, რომ რიტუალი ჩაატარონ.
ჰყავთ თავისი ქურუმი — ამასაც ვხედავთ — რომელიც, მათ შორის, მათი ტელევიზიიდან ქადაგებს, ხომ? ჰყავთ საკუთარი ქურუმი. აქვთ საკუთარი შეძახილები რიტუალის ჩატარების დროს. ყველაფერი... აქვთ საკუთარი სალოცავები ევროკავშირის დროშის სახით, რომელზეც ისინი ლოცულობენ და ასე შემდეგ.

ყველაფრით, აბსოლუტურად, არის ფსევდორელიგიური სექტა. და ამას, მე მგონი, სჭირდება კიდევ უფრო დეტალური ანალიზი... და როგორც ფსევდორელიგიური, ფუნდამენტალისტური სექტა, ზუსტად ისე იქცევიან: როგორც კი ვინმე ამ სექტას განუდგება, ქრისტესავით ჩაქოლავენ, და როგორც კი ვინმე მათ სექტის დოგმებს უარყოფს, იმ მომენტშივე ქვებს ესვრიან და ქოლავენ," — განაცხადა პაპუაშვილმა.