აგვისტოს ომიდან 18 წელი გავიდა. ამ თარიღთან დაკავშირებით ევროპული ქვეყნების საგარეო უწყებებმა განცხადებები გამოაქვეყნეს.

სლოვენიის საგარეო და ევროპის საქმეთა სამინისტროს მიერ გავრცელებულ განცხადებაში აღნიშნულია, რომ 2008 წელს რუსეთი თავს დაესხა საქართველოს. 18 წლის შემდეგაც კი, აფხაზეთისა და სამხრეთ ოსეთის ოკუპაცია კვლავ გრძელდება. განცხადებაში ასევე წერია, რომ სლოვენია საქართველოს სუვერენიტეტისა და ტერიტორიული მთლიანობის მიმართ მხარდაჭერას ადასტურებს.

"სლოვენია კიდევ ერთხელ ადასტურებს მხარდაჭერას საქართველოს სუვერენიტეტისა და ტერიტორიული მთლიანობის მიმართ. ხანგრძლივი მშვიდობა და უსაფრთხოება მხოლოდ საერთაშორისო სამართლისა და გაეროს ქარტიის სრული პატივისცემის საფუძველზე შეიძლება აშენდეს", — წერია განცხადებაში.

აღნიშნულ თარიღთან დაკავშირებით განცხადება გამოაქვეყნა ლიეტუვის საგარეო უწყებამაც. მათი განმარტებით, ლიეტუვა გმობს აფხაზეთისა და ცხინვალის უკანონო ოკუპაციას და მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას.

"18 წლის წინ რუსეთმა საქართველოს წინააღმდეგ აგრესიული ომი დაიწყო და აფხაზეთისა და ცხინვალის რეგიონების ოკუპაცია განახორციელა.ლიეტუვა გმობს ამ რეგიონების მიმდინარე უკანონო ოკუპაციას და მტკიცედ უჭერს მხარს საქართველოს სუვერენიტეტსა და ტერიტორიულ მთლიანობას", — აღნიშნულია განცხადებაში.

პოლონეთის საგარეო საქმეთა სამინისტრომ X-ზე დაწერა, რომ რუსეთის მიერ საქართველოს წინააღმდეგ აგრესიის მე-18 წლისთავზე ქართველ ხალხს სოლიდარობას უცხადებენ. განცხადებაში ასევე აღნიშნულია, რომ პოლონეთი ურყევად უჭერს მხარს საქართველოს სუვერენიტეტსა და ტერიტორიულ მთლიანობას.

"რუსეთის მიერ საქართველოს წინააღმდეგ აგრესიის მე-18 წლისთავზე, სოლიდარობას ვუცხადებთ ქართველ ხალხს. პოლონეთი ურყევად უჭერს მხარს საქართველოს სუვერენიტეტსა და ტერიტორიულ მთლიანობას მის საერთაშორისოდ აღიარებულ საზღვრებში", — წერია განცხადებაში.

განცხადება გამოაქვეყნა ნორვეგიის საგარეო უწყებამაც, სადაც აღნიშნულია, რომ 2008 წლის აგვისტოში რუსეთის ჯარები საქართველოში შმოიჭრნენ.

"2008 წლის აგვისტოში რუსეთის ჯარები საქართველოში შეიჭრნენ. 18 წლის შემდეგაც კი, ოკუპაცია გრძელდება. როგორც საქართველოში, ისე უკრაინაში, ჩვენ კიდევ ერთხელ მოვუწოდებთ რუსეთს, შეწყვიტოს საერთაშორისო სამართლის აშკარა დარღვევა და პატივი სცეს მისი მეზობელი ქვეყნების სუვერენიტეტსა და ტერიტორიულ მთლიანობას", — აღნიშნულია განცხადებაში.