მოკლული ასწავლებლის, გიგა ავალიანის დედა, ეკა კუპატაძე, სოციალურ ქსელში ნ.ი-სა და ა.ბ-ს დაკავების ფაქტს ეხმაურება და ამ ნაბიჯს სამართლიანობის აღდგენისკენ გადადგმულ მორიგ გამარჯვებას უწოდებს.

ეკა კუპატაძე პოსტში პასუხობს დაკავებული არასრულწლოვნის დამცველებსა და საზოგადოების იმ ნაწილს, რომელმაც დაკავების კადრებს სენტიმენტალურად შეხედა. მისი თქმით, კანონის მიხედვით, როდესაც არსებობს დასაბუთებული ვარაუდი და დანაშაულის ნიშნები, მოსამართლის განჩინებას ვერანაირი ემოციური ფონი და "ტანტრუმი" ვერ შეცვლის. იგი ხაზგასმით აღნიშნავს, რომ დაკავებულები მანიპულატორები არიან და სწორედ მათმა ქმედებებმა მიიყვანა საქმე ტრაგედიამდე.

"წუხელ დაიჭირეს ნ.ი. და ა.ბ.!

საქართველომ მორიგი ბრძოლა მოუგო ჯანმრთელი, უდანაშაულო, გენიოსი, ახალგაზრდა ექიმის — გიგა ავალიანის — მკვლელებს!

საქართველოვ, მადლობა ამ გიჟურ ომში თანაბრძოლისთვის!

თეთრად გავათენე, მაგრამ ფეისბუქში ვერ შევედი. თუმცაღა გავიგე, რომ "ნიაკოს" დამცველები გასჩენია. ლეკიშვილის მიზანი მიღწეულია — თქვენ მის ანკესს ნამდვილად წამოეგეთ. ვინც ვერ ერკვევით, განგიმარტავთ: სისხლის სამართლის საპროცესო კოდექსის მე-17 მუხლის მიხედვით: "თუ არსებობს დასაბუთებული ვარაუდი, რომ პირმა დანაშაული ჩაიდინა, მას ბრალდება უნდა წარედგინოს". ბრალდებულის დაკავებას კი, რომელიც მოსამართლის განჩინებით ხდება, "დედის" ტანტრუმი ვერ უშველის.

ჩემთვის ნ.ი. "არასრულწლოვანი" კი არა, მკვლელია. დიახ, მე ვარ სუბიექტური, მაგრამ 10 თვეა ვცდილობ, თავი ხელში ავიყვანო და ობიექტურად შევაფასო მოვლენები. იმნაძე-ნავროზაშვილები არიან მანიპულატორები. სწორედ ასეთი მანიპულაციებით მოაკვლევინეს სისხლისმსმელ ალექსანდრე გაბაშვილს და გიორგი რიკაძეს ჩემი სპეტაკი შვილი.

რაც შეეხება დაკავების ამსახველ კადრებს, მე ვფიქრობ, მთელმა საქართველომ ერთი და იგივე კადრები ნახა.

მე ვნახე ნ.ი-ს ადვოკატის გიორგი ლეკიშვილის პირდაპირი ჩართვა, სადაც ჩანდა თამუნა ნავროზაშვილის ისტერიკების ფონზე წყნარად მდგარი პოლიცია და შილაკწასმულ თითებში მშვიდად თავჩარგული "ნიაკო", რომელსაც ადვოკატი დროდადრო თავზე უსვამდა ხელს.
სხვა კადრები თუ არსებობს, ჩამიგდეთ.

ძალას მოვიკრებ და ამ ვიდეოს ანალიზს დავდებ მათთვის, ვისაც იქ მხოლოდ ნავროზაშვილის ჩხავილი ესმის და ანალიზი არ შეუძლია.

ისე, ჩემთვის ნავროზაშვილის ჩხავილზე მძიმე მოსასმენი 2 დღის წინ, შუაღამით, გიგას საფლავზე ნიკას ზლუქუნი იყო:
— "გიგა მენატრება, დეეე, მინდა შევეხო, ამოვთხაროთ, რა".

ვისაც გგონიათ, რომ არასწორს ვამბობ და ამ წინადადებით უბრალოდ ფსიქოლოგიურად ვძალადობ თქვენზე, კამერის ჩანაწერს ჩაგიგდებთ პირადში და მოისმინეთ. გიგა ავალიანის სამართალი დადგება სრულყოფილად!", — დაწერა ეკა კუპატაძემ.

შეგახსენებთ, გუშინ, 5 აგვისტოს გიგა ავალიანის მკვლელობის საქმესთან დაკავშირებით არასრულწლოვნები — ნ.ი და ა.ბ დააკავეს.