თბილისის მერიამ, ხელშეკრულების პირობების დარღვევის გამო, რუსთაველის გამზირის კონტრაქტორი "სმარტ სოლუშენსი" დააჯარიმა.

სახელმწიფო შესყიდვების სააგენტოს ვებგვერდზე გამოქვეყნებული ინფორმაციის თანახმად, ბესიკის ქუჩიდან თავისუფლების მოედნამდე მონაკვეთზე 7 აგვისტოს ჩატარებულმა მონიტორინგმა დაადგინა, რომ კონტრაქტორი კომპანია 24-საათიან რეჟიმში არ მუშაობდა. კომპანიას 1 583 ლარის ოდენობის ჯარიმა დაეკისრა.

"ქალაქ თბილისის მუნიციპალიტეტის მერიის ინფრასტრუქტურის განვითარების საქალაქო სამსახურის 2026 წლის 10 აგვისტოს წერილიდან ირკვევა, რომ დაირღვა ქალაქ თბილისის მუნიციპალიტეტის მერიასთან 2026 წლის 10 ივლისს დადებული სახელმწიფო შესყიდვის შესახებ ხელშეკრულების (ქ. თბილისში, მთაწმინდის რაიონში, შ. რუსთაველის გამზირის (ბესიკის ქუჩიდან თავისუფლების მოედნამდე) მონაკვეთის სარეაბილიტაციო სამუშაოები) პირობები. კერძოდ, ზემოაღნიშნული ხელშეკრულების ფარგლებში, ქალაქ თბილისის მუნიციპალიტეტის მერიის ინფრასტრუქტურის განვითარების საქალაქო სამსახურის 2026 წლის 27 ივლისის წერილით დაგევალათ ქ. თბილისში, მთაწმინდის რაიონში, შ. რუსთაველის გამზირის (ბესიკის ქუჩიდან თავისუფლების მოედნამდე) სარეაბილიტაციო სამუშაოების წარმოება 2026 წლის 28 ივლისიდან, 24-საათიან რეჟიმში (ხელშეკრულების მე-3 მუხლის 3.5 პუნქტის შესაბამისად). თუმცა 2026 წლის 7 აგვისტოს (19:58 საათი) ინსპექტირების აქტიდან ირკვევა, რომ ზემოაღნიშნულ ობიექტზე სამუშაოები 24-საათიან რეჟიმში არ მიმდინარეობდა," — ნათქვამია საჯარიმო ინფორმაციაში (წყარო BMG).

BMG-ის ინფორმაციით, ანალოგიური დარღვევისთვის კომპანიას ჯარიმა 24 და 30 ივლისსაც დაეკისრა. "სმარტ სოლუშენსმა" სამუშაოები 23 ივლისს, 00:00 საათზე დაიწყო და მას 24-საათიან რეჟიმში მუშაობა მოეთხოვება — ხელშეკრულების თანახმად, პროექტი 100 დღეში უნდა დასრულდეს.

რუსთაველის გამზირის რეაბილიტაციისთვის გამოცხადებული 20 მილიონი ლარის ღირებულების ტენდერებში გამარჯვებულად მიმდინარე თვის დასაწყისში შპს "სმარტ სოლუშენსი" გამოვლინდა.

შეგახსენებთ, თბილისის მერის, კახა კალაძის განცხადებით, რუსთაველის გამზირის რეაბილიტაცია ნოემბრის ბოლოს დასრულდება.