პარტია ერთიანი ნაციონალური მოძრაობის მმართველობითი საბჭოს ხელმძღვანელი ირაკლი ფავლენიშვილი ირანის წინააღმდეგ ევროკავშირის მიერ ივლისში მიღებული სანქციების არ გაზიარებას ბრიფინგზე გამოეხმაურა. შეგახსენებთ, რომ EU-ს ახალ სანქციებს 9 ქვეყანა შეუერთდა. ესენია: ალბანეთი, ბოსნია და ჰერცეგოვინა, ისლანდია, ლიხტენშტაინი, მოლდოვის რესპუბლიკა, მონტენეგრო, ჩრდილოეთ მაკედონია, ნორვეგია და უკრაინა.

ფავლენიშვილმა პარტიის ოფისში გამართულ ბრიფინგზე განაცხადა, რომ "არაერთი ისეთი საერთაშორისო გადაწყვეტილება იყო ივანიშვილის რეჟიმის მხრიდან მიღებული, რომელიც ნათლად აჩვენებს, თუ სად დგას ამ ცივილიზაციურ დაპირისპირებაში ივანიშვილის ოცნება."

"აქ უკვე ჩვენ ვსაუბრობთ იმ რეჟიმზე, რომელიც ცალსახად დგას ბოროტების ღერძის ქვეყნების მხარეს. არაერთი ისეთი საერთაშორისო გადაწყვეტილება იყო ივანიშვილის რეჟიმის მხრიდან მიღებული, რომელიც ნათლად აჩვენებს, თუ სად დგას ამ ცივილიზაციურ დაპირისპირებაში ივანიშვილის ოცნება. საუბარია, რა თქმა უნდა, იმ რეჟიმის საწინააღმდეგო სანქციებზე, რომელიც არის ტერორიზმის დამფინანსებელი, რომელიც არის, მათ შორის, ამერიკის შეერთებული შტატების მთავარი, თავდაცვის სფეროს ლიდერის მთავარი მტერი რეგიონში. გამომდინარე აქედან გასაგებია, თუ რას ნიშნავს, როდესაც ასეთ გადაწყვეტილებაში, მათ შორის, სანქციების კუთხით, არ ფიგურირებს ხოლმე საქართველო და ამ შემთხვევაშიც, სამწუხაროდ, ეს არ გახლავთ გასაკვირი არავისთვის, რომ საქართველო არ უერთდება ევროპული სანქციების პოლიტიკას და უჭირავს ის პოზიცია, რომელიც უჭირავს უკვე ბოლო წლების განმავლობაში", — განაცხადა მან (მის სიტყვას "ტვ პირველი" აქვეყნებს).

აღნიშნულ საკითხთან დაკავშირებით კითხვას უპასუხა ქართული ოცნების დეპუტატმა, თენგიზ შარმანაშვილმაც, რომელმაც აღნიშნა, რომ ნებისმიერი ნაბიჯი, მათ შორის რეზოლუციის მხარდაჭერა, ტესტს გაივლის ეს მათ "ინტერესებში შედის თუ არა".

"საქართველო ნებისმიერ რეზოლუციას შეუერთდება ან არ შეუერთდება... ეს რეზოლუცია იქნება თუ სხვა ნაბიჯი, პოლიტიკასთან დაკავშირებულ საერთაშორისო [საკითხებზე] გადადგამს თუ არ გადადგამს, ჩვენი ტესტი ასეთია: რა ნაბიჯიც არ უნდა გადაიდგას, პირველ რიგში გაივლის ტესტს — ეს ჩვენს ინტერესებში შედის თუ არა. თუ ჩავთვლით, რომ არ შედის, არ გადავდგამთ", — თქვა მან ("ტვ პირველი").

შეგახსენებთ, ევროკავშირის უმაღლესი წარმომადგენლის მიერ 14 აგვისტოს გამოქვეყნებული სამი ოფიციალური დოკუმენტის თანახმად, საქართველო არ არის იმ ქვეყნებს შორის, რომლებმაც ირანის წინააღმდეგ ევროკავშირის მიერ ივლისში მიღებული სანქციები გაიზიარეს.

"საბჭოს ამ გადაწყვეტილებას უერთდებიან ალბანეთი, ბოსნია და ჰერცეგოვინა, ისლანდია, ლიხტენშტაინი, მოლდოვის რესპუბლიკა, მონტენეგრო, ჩრდილოეთ მაკედონია, ნორვეგია და უკრაინა. ისინი უზრუნველყოფენ, რომ მათი ეროვნული პოლიტიკა შეესაბამებოდეს აღნიშნულ გადაწყვეტილებას", — აღნიშნულია საბჭოს მიერ გავრცელებულ განცხადებაში.