ნაციონალური მოძრაობის ლიდერი ნიკა მელია ფიქრობს, რომ ის საქართველოში უკეთ ხედავს, რა ხდება, ვიდრე მიხეილ სააკაშვილი სხვა ქვეყნიდან. ამის შესახებ ნიკა მელიამ ტოქ-შოუ რეაქციაში განაცხადა.

მისი აზრით, ეს არის "ნაციონალური მოძრაობის მონაგარი" და თუ ვინმე უნდა იყოს ამ პროცესით კმაყოფილი, პირველ რიგში, მიხეილ სააკაშვილია.

"დიახაც, შესაძლებელია, მე აქ უკეთ ვხედავ, რა ხდება კონკრეტულ მოცემულ დღეს, ვიდრე ჩვენი მეგობარი, ლიდერი, რომელზეც უკანონოდ ხორციელდება პოლიტიკური დევნა", — განაცხადა ნიკა მელიამ.

ჟურნალისტის კითხვაზე, ეს ნიშნავს თუ არა, რომ ნიკა მელია მიხეილ სააკაშვილზე ადეკვატურია, ის პასუხობს, რომ "ეს არის ბუნებრივი ამბავი".

"თქვენ უკეთ იცით სტუდიაში რა ხდება, ვიდრე ჩემთან ზელენსკის ქუჩაზე იციან, რა ხდება სტუდიაში. აქ სკანდალის შემცველი არაფერი არ არის. პირიქით, ეს არის პლუსი, როცა მე შემიძლია მიშას ვურჩიო ის, რაც საერთო საქმისთვის უკეთესია და მე მან მირჩიოს", — განაცხადა მელიამ.

მან თქვა, რომ უახლოეს მომავალში აპირებს შეხვდეს მიხეილ სააკაშვილს, რადგან "2020 წლის არჩევნები მოახლოვდა".

"ყველაფერზე დაველაპარაკები, რაც მოემსახურება გაერთიანებული ოპოზიციის გამარჯვებას", — განაცხადა ნიკა მელიამ.

ნიკა მელიამ ოპოზიციის ზოგიერთი ლიდერის მხრიდან "წინდაუხედავ განცხადებებზე" არჩევნების დღეს განსხვავებული აქცენტების პირდაპირ ეთერში ისაუბრა. მან თქვა, რომ "ბევრი ოპოზიციური პოლიტიკოსი გამოდის, რომ დავიწყებ რევოლუციას და არ იწყება ეს რევოლუცია", რაც ამომრჩეველს "უარეს სასოწარკვეთაში აგდებს. ნიკა მელიას განცხადებით, გაერთიანებული ოპოზიცია უნდა შეიკრიბოს და ერთად გადაწყვიტონ სამოქმედო გეგმა. მისი თქმით, ემოციურ ფონზე განცხადებები არ უნდა გაკეთდეს.

ნიკა მელიას ამ განცხადებამ აზრთა სხვადასხვაობა გამოიწვია, საზოგადოების ნაწილმა ივარაუდა, რომ ნიკა მელია მიხეილ სააკაშვილსა და სანდრა რულოვსს დაუპირისპირდა, ნაწილმა კი ოპოზიციაში სავარაუდო განხეთქილებაზე დაიწყო საუბარი. ნიკა მელიას ამ გაცხადებას წინ უსწრებდა მიხეილ სააკაშვილისა და სანდრა რულოვსის შემდეგი ფრაზები.

მიხეილ სააკაშვილი: "ჩვენ უნდა ვიყოთ, შეტევაზე, შეტევაზე და მხოლოდ შეტევაზე".

სანდრა რულოვსი: "თქვენ მე არ მიცნობთ. ჩვენ მოგებული გვაქვს პირველი ტური, თუ ისინი გამოაცხადებენ პირველ ტურში გამარჯვებას, მიიღებენ მთელი ქვეყნის პროტესტს, მე ვადასტურებ ამას".

ნიკა მელიას განცხადებას გამოეხმაურა ნაციონალური მოძრაობის წევრი ნუგზარ წიკლაური და თქვა, რომ მელიას განცხადებები "ბიძინა ივანიშვილის პოლიტიკურ წისქვილზე ასხავს წყალს".

იქამდე, სანამ ზუგდიდის მერობის კანდიდატად სანდრა რულოვსი დასახელდებოდა, ნიკა მელიამ თავად დაადასტურა, რომ პარტიაში ზუგდიდის მერობის კანდიდატად განიხილებოდა.