გარდაცვლილ დემურ სტურუას საქმეში ბრალდებული, დაკავებული გოდერძი თევზაძე უკვე მეექვსე დღეა, რაც ქუთაისის ციხეში შიმშილობს. მისი ადვოკატის ინფორმაციით, ის ბრალს არ აღიარებს.

მისი განმარტებით, საქმეში არ არსებობის მტკიცებულება, რომლის თანახმადაც თევზაძე ციხეში უნდა იმყოფებოდეს:

"აქიდან გამომდინარე, ის შიმშილობს, რომ ერთხელ და სამუდამოდ დადგინდეს სიმართლე, რომ მას არ მიუყვანია თვითმკვლელობამდე დემურ სტურუა, არ უძალადია მასზე, არანაირი ნიშნები არ მოიპოვება და არანაირი სამსახურებრივი უფლებამოსილების გადამეტება არ აქვს მას ჩადენილი".

22 წლის დემურ სტურუამ 7 აგვისტოს სამტრედიის რაიონში თავი მოიკლა. გარდაცვლილმა დატოვა წერილი, რომელშიც წერია რომ მასზე ერთ-ერთი პოლიციელი ზეწოლას ახორციელებდა.

სამსახურებრივი უფლებამოსილების ძალადობით გადამეტებისა და თვითმკვლელობამდე მიყვანის ჩადენაში ბრალდებული, ძებნაში მყოფი გოდერძი თევზაძე 13 სექტემბერს ნებაყოფლობით გამოცხადდა საგამოძიებო ორგანოში.

მისი სასამართლო სხდომა 15 სექტემბერს გაიმართა და მოსამართლემ ის წინასწარ პატიმრობაში დატოვა.