საბერძნეთში სტიქიის ზონაში, სადაც საქართველოს ორ მოქალაქეს ეძებდნენ, ერთი მათგანი იპოვეს. ამის შესახებ ინფორმაციას საბერძნეთში საქართველოს ელჩი იოსებ ნანობაშვილი ავრცელებს.

"ერთი მოქალაქე მოძებნილ იქნა და ის ოჯახთანაა და უსაფრთხოდ არის", - ამბობს ნანობაშვილი.

პირების დაკარგვის შესახებ ოჯახის წევრებმა საელჩოს რამდენიმე საათის წინ ცხელ ხაზზე შეატყობინეს. სტიქიის გამო საქართველოს საელჩოში ცხელი ხაზის ნომერი მოქმედებს: +30 69 9577 9793.

ტყის ხანძრების გამო საბერძნეთში ათობით ადამიანი დაიღუპა, ხოლო ასზე მეტი დაშავდა. მაღალი ტემპერატურის გამო ხანძრები რამდენიმე დღის წინ საბერძნეთის სამხრეთ-აღმოსავლეთ ნაწილში, ათენიდან ათიოდე კილომეტრში, საკურორტო ზონებში გაჩნდა, რის გამოც მოსახლეობამ ევაკუაცია დაიწყო. ცეცხლისგან თავდასაცავად ისინი ზღვაში შედიან.

ქვეყნის პრემიერ-მინისტრმა ალექსის ციპრამ ხანძრების გამო საგანგებო რეჟიმი გამოაცხადა. ხანძრის ლოკალიზება ამ დრომდე ვერ ხერხდება.