27 სექტემბერს ტელეკომპანია "ფორმულამ" პროევროპულ აქციებზე დაკავებული არჩილ მუსელიანცის ციხიდან გამოგზავნილი წერილი გაავრცელა, რომელსაც მალევე გამოეხმაურა პენიტენციური დაწესებულებაც.

რას ედავებოდნენ არჩილ მუსელიანცს?

არჩილ მუსელიანცი თავდაპირველად 2024 წლის 30 ნოემბერს ადმინისტრაციული მუხლით დააკავეს, თუმცა შემდეგში ქმედება სისხლის სამართლით გათვალისწინებულ დანაშაულად გადაუკვალიფიცირდა. მუსელიანცს პარლამენტის სათვალთვალო კამერის სადენებისთვის ცეცხლის წაკიდებისთვის 4 წლით თავისუფლების აღკვეთა მიესაჯა. პროკურატურის მტკიცებით, მუსელიანცის ქმედებით სახელმწიფოს "534 ლარის ზიანი მიადგა".

"აქ ჩვენ ადამიანებად არ ვითვლებით"

მუსელიანცი წერს, რომ კარანტინში პატიმრებს არაჰიგიენურ და მძიმე პირობებში ამყოფებენ. მისი თქმით, საკნებში კანალიზაციის წყალი ამოდის, არის ტარაკნები და ვირთხები, პატიმრებს კი ხშირად უწევთ გადატვირთულ და მცირე ფართობის საკნებში ყოფნა. მუსელიანცი ასევე ამბობს, რომ კარანტინში პატიმრებს დეზინფექცია არ უტარდებათ და მათთვის ტანსაცმლის ქონაც შეზღუდულია.

მუსელიანცი ასევე საუბრობს სამედიცინო მომსახურებისა და კვების პრობლემებზე. მისი თქმით, პატიმრების დიდი რაოდენობის გამო ექიმები დროულად ვერ ემსახურებიან ყველას, ხოლო საკვებში ხშირად არის უმი, ჭუჭყიანი ან უხარისხო პროდუქტები. მუსელიანცი აცხადებს, რომ ციხის ადმინისტრაციის მხრიდან პრობლემებზე საუბრის გამო პატიმრებზე ზეწოლაც ხდება და ამბობს, რომ თუ მის მიერ გავრცელებული ინფორმაცია სიმართლეს არ შეესაბამება, პენიტენციურმა სამსახურმა ამის საპირისპირო უნდა დაამტკიცოს.

ამას გარდა, მუსელიანცი კორესპონდენციის გახსნისა და ამოღების ორ შემთხვევაზე წერს. მისი თქმით, 8 სექტემბერს მორიგე ოფიცერმა მას გახსნილი, ანუ შემოწმებული კორესპონდენცია გადასცა. ხოლო 11 სექტემბერს იმავე ოფიცერმა კვლავ გახსნილი კორესპონდენცია მიაწოდა, თუმცა ამჯერად, მისი თქმით, წერილიდან ფურცელი იყო ამოღებული. მუსელიანცი ამას ცენზურის დაწესებად აფასებს.

"თქვენ ყოფილხართ ისეთ სარდაფში, საიდანაც ფიზიკურად ვერ გამოხვალთ და გიწევთ იქ ყოფნა, სადაც კანალიზაციიდან განავალი ამოდის? ახლა ვსაუბრობ კარანტინზე, საპირფარეშოში მილიდანაც და ნიჟარის მილიდანაც განავალი ამოდის პატარა წვიმის დროსაც, წვიმა რომ მთავრდება განავლის ვულკანიც მთავრდება. თავად ნიჟარა საპირფარეშოში არ არის, 1 ნიჟარაა და საერთო ოთახშია, საკანში. წვიმა რომ დამთავრდა, ხომ არ გგონიათ, რომ სხვა საკანში გადაგვიყვანეს? არა, რადგან გადასაყვანად ადგილები არ იყო, კანალიზაციის წყალი იმ სარდაფშივე შრებოდა და ჩვენ პატიმრები ამას ვსუნთქავდით. მთელი დღე რომ გავიდა, უკვე ჩვენ დავუძახეთ კარანტინის მორიგეს და ვთხოვეთ, რომ სხვა მშრალ საკანში გადავეყვანეთ, რადგან გაუსაძლისია აქ ყოფნა.

...კარანტინში გდია 6 ლეიბი და 6 ბალიში, რომლებიც ძალიან ბინძურია, ვერ წარმოიდგენთ როგორი ბინძურია. მატყლის ლეიბია და ათასჯერ დაშარდული, ათას ადამიანგამოვლილი, ტარაკნები ყველა ზომის, ყველა ჯიშის და ყველა სახის, ფიზიკურად ვერ დაიძინებ. ვირთხები, რომლებიც საპირფარეშოდან ამოდიან-ჩადიან. ყველაფერი იმისკენ არის მიმართული, გაგრძნობინონ, რომ შენ არ ხარ ადამიანი, რომ შენ ხარ პირუტყვი, საქონელი, რადგან კანონი დაარღვიე შენ არ ხარ საზოგადოების წევრი. კარანტინში არ შეიძლება ტანსაცმელი, დეზინფექციას არ გიტარებენ, არ გაბანავებენ, როგორც ნომერს ისე გექცევიან, შენ არ ხარ ადამიანი, როგორც საგანს, ისე გამწყვდევენ" — წერს არჩილ მუსელიანცი.

პენიტენციური სამსახური მუსელიანცის ბრალდებებს უარყოფს და აცხადებს, რომ მისი განცხადებები სისტემის დისკრედიტაციის მცდელობაა. სამსახურის თქმით, მუსელიანცი სხვა მსჯავრდებულებთან და ადმინისტრაციასთან კონფლიქტური ქცევით გამოირჩევა, რის გამოც საკნებს ხშირად იცვლის და ასეთ დროს კარანტინში გადაყვანა დადგენილი წესით ხდება. უწყება ასევე უარყოფს ინფორმაციას დაწესებულებებში ანტისანიტარიის, სამედიცინო მომსახურების მიუწვდომლობისა და უხარისხო კვების შესახებ.

რაც შეეხება კორესპონდენციას, სამსახურის განმარტებით, წერილების მიღება, გაგზავნა და შემოწმება უსაფრთხოების მოთხოვნების შესაბამისად, შინაარსის გაცნობის გარეშე ხდება. უწყება ამბობს, რომ მუსელიანცის მიერ ამის "ცენზურად" წარმოჩენა საკითხის არასწორი ინტერპრეტაცია და საზოგადოების შეცდომაში შეყვანის მცდელობაა. პენიტენციური სამსახური მედიასა და სხვა დაინტერესებულ პირებს მოუწოდებს, სისტემასთან დაკავშირებული ინფორმაციის გავრცელებისას გადამოწმებულ და დადასტურებულ ფაქტებს დაეყრდნონ.

დღეს, 28 სექტემბერს, არჩილ მუსელიანცის დედობილი ცარო ოშაყმაშვილი სახალხო დამცველის ოფისში მივიდა. ცარო ოშაყმაშვილი ითხოვს, რომ სახალხო დამცველი ჯერ მას შეხვდეს, შემდეგ კი თავად მოინახულოს ციხეში არჩილ მუსელიანცი და ადგილზე გაეცნოს მის მიერ აღწერილ პატიმრობის პირობებს.