საქართველოსა და აზიის ინფრასტრუქტურის საინვესტიციო ბანკს შორის 158.5 მლნ ევროს ოდენობის სასესხო შეთანხმება გაფორმდა, რომლის ფარგლებში კახეთში საავტომობილო გზების რამდენიმე მონაკვეთის მშენებლობა დაფინანსდება. ამის შესახებ ინფორმაციას ფინანსთა სამინისტრო ავრცელებს.

უწყების ცნობით, დოკუმენტს ხელი მოაწერეს საქართველოს ფინანსთა მინისტრმა, ლაშა ხუციშვილმა და აზიის ინფრასტრუქტურის საინვესტიციო ბანკის უფროსმა საინვესტიციო ოფიცერმა (საჯარო სექტორი, გლობალური პროექტები და კორპორატიული ფინანსები) კონსტანტინ ლიმიტოვსკიმ.

პროექტის მიზანია, ოთხზოლიანი საავტომობილო გზის მონაკვეთების — ბადიაურიდან ჩალაუბნამდე (ლოტი 4 — 21.7 კმ) და ჩალაუბნიდან ბაკურციხემდე (ლოტი 5 — 9.1 კმ) კახეთის გზატკეცილის გასწვრივ და საავტომობილო გზის მონაკვეთის — გურჯაანიდან თელავამდე (36.6 კმ) მშენებლობა.

კახეთის მიმართულებით საგზაო ინფრასტრუქტურისათვის პროექტის ჯამური ღირებულება 316.8 მლნ ევროა და მის ფარგლებში, მსოფლიო ბანკის მიერ უკვე დამტკიცებული და საქართველოსთვის გამოყოფილია 158 მლნ ევრო.

პროექტის აღმასრულებელი ორგანიზაცია იქნება საქართველოს რეგიონული განვითარებისა და ინფრასტრუქტურის სამინისტრო, ხოლო პროექტს განახორციელებს საავტომობილო გზების დეპარტამენტი.