სამედიცინო საქმიანობის დროს, ექიმის მიერ დაშვებული გადაცდომის, შეცდომის ან ჩადენილი დანაშაულის გაშუქების გამო მასმედიას შესაძლოა სანქციები დაუწესდეს. პარლამენტში საკანონდებლო ინიციატივა არასამთავრობო ორგანიზაცია საქართველოს კლინიკების ასოციაციამ შეიტანა.

ინიციატივის მიხედვით, აღნიშნულ საკითხებზე მასმედიის საშუალებით ღიად საუბარი, ექსპერტიზის დასკვნის, სამედიცინო საქმიანობაზე ზემდგომი მარეგულირებელი ორგანოს ან სასამართლო გადაწყვეტილების გარეშე გამოიწვევს მედიასაშუალების დაჯარიმებას 1 000 ლარით, განმეორებით შემთხვევაში კი - თანხა გაორმაგდება. ამავე დროს მედიას დაეკისრება ვალდებულება უარყოს მის მიერ გაჟღერებული ინფორმაცია.

გარდა ამისა, კლინიკების ასოციაცია მოითხოვს სამედიცინო საქმიანობის დროს პაციენტის ან მისი კანონიერი წარმომადგენლის მხრიდან, ექიმისთვის ან სხვა სამედიცინო პერსონალისთვის, რაიმე ფორმით ხელის შეშლა, ექიმის ღირსებისა და პატივის შელახვა, ექიმზე ფიზიკური ზემოქმედება ან ფსიქოლოგიური ზეწოლა და მუქარა 1 000 ლარით დაჯარიმდეს.

ამასთან, საკანონმდებლო წინადადებების თანახმად, დაუშვებელია: სამედიცინო დაწესებულებაში პირის ან პირთა ჯგუფის მიერ ძალით შეჭრა, რაიმე ფორმით მისი ნორმალური ფუნქციონირებისთვის ხელის შეშლა, სამედიცინო პერსონალის ნივთების, დაწესებულების ექსტერიერის, ინტერიერის, აპარატურის ან ინვენტარის განზრახ დაზიანება. აღნიშნული ქმედება ჩადენილი ერთი პირის მიერ 1 000 ლარით დაჯარიმდება, პირთა ჯგუფის მიერ კი - 2 000 ლარით.