ფეისბუქისა და ტვიტერის მსგავსად, გუგლმაც გადაწყვიტა, რომ საკუთარი წვლილი შეიტანოს სოციალურ ქსელში გავრცელებული დეზინფორმაციის წინააღმდეგ ბრძოლაში. ბოლო თვეების განმავლობაში, კომპანიამ არაერთ Fact-Checking ორგანიზაციასთან ითანამშრომლა, დაიწყო ახალი ამბების გამავრცელებლის შესახებ დამატებითი ინფორმაციის ჩვენება, შექმნა სანდოობის სპეციალური ნიშნები და დეზინფორმაციის აღმოჩენის შემთხვევაში ადმინისტრაციისთვის შეტყობინების ფუნქცია. მიუხედავად ამისა, კომპანია თვლის, რომ ეს ღონისძიებები არ არის საკმარისი არასწორი ინფორმაციის შესამცირებლად.

"დღეს ძალიან რთულია გაარჩიო, რა არის სიმართლე და რა სიცრუე", - ნათქვამია კომპანიის მიერ გამოქვეყნებულ ბლოგ-პოსტში.

"ჟურნალისტიკის ბიზნეს მოდელები რადიკალურ იცვლება. ტექნოლოგიების განვითარებასთან ერთად, სხვადასხვა ინსტიტუტები, მათ შორის მედია-საშუალებები, დიდი გამოწვევის წინაშე დგანან", - ვკითხულობთ ბლოგში.

ასე რომ, იმისთვის, რათა დაწყებული პოლიტიკა ეფექტიანად გააგრძელოს, კომპანიამ Google News Initiative (GNI) წარადგინა.

GNI სამ ძირითად საკითხზე იქნება ფოკუსირები. პირველ რიგში, პლატფორმა ხარისხიანი ჟურნალისტიკის გაძლიერებასა და წინ წამოწევაზე იმუშავებს. ამასთან ერთად, მისი მიზანი იქნება ბიზნეს მოდელების განვითარება მედია ორგანიზაციებისთვის, რათა მუშაობა იყოს მომგებიანი და ბოლოს, მედია-საშუალებებს თანამედროვე ტექნოლოგიების დანერგვაში დაეხმარება.

ხარისხიანი და სანდო ჟურნალისტიკის გასაძლიერებლად, Google-მ შექმნა Disinfo Lab-ი, რომელიც სასწრაფო ინფორმაციის გავრცელებისას და არჩევნების დროს დეზინფორმაციის ამოცნობასა და გაფილტრვაზე იმუშავებს. ეს სისტემა ჰარვარდის უნივერსიტეტის First Draft-ის პროექტთან ერთად ამუშავდება.

Google MediaWise-ის პროქტის განვითარებაზე პოინტერის ინსტიტუტთან, სტენფორდის უნივერსიტეტთან და ადგილობრივ მედია საშუალებებთანაც თანამშრომლობს. MediaWise-ის მიზანია, რომ ახალგაზრდა მომხმარებლებს მედიისა და მისი სანდოობის შესახებ მეტი ინფორმაცია მიაწოდოს და თვითშემეცნებაში ხელი შუეწყოს.

Google ამბობს, რომ ამ მიზნების განხორციელებაში კომპანია $300 მილიონის დახარჯვას აპირებს.

"მოქმედებები, რომელსაც ჩვენ ვახორციელებთ, მეტყველებს იმაზე, რომ ჩვენი პრიორიტეტი ხარისხიანი და სანდო ჟურნალისტიკაა. ჩვენ ვიცით, რომ კარგი საქმეები მხოლოდ თანამშრომლობით კეთდება, ამიტომ ვიმედოვნებთ, შევძლებთ კოლაბორაციას მედია ორგანიზაციებთან, რათა ჟურნალისტიკის ნათელი მომავალი ერთად შევქმნათ", - წერს Google.