შინაგან საქმეთა მინისტრის მოადგილის, კახაბერ საბანაძის თქმით, შსს-მ და სუს-მა "მაქსიმალური გააკეთეს" არჩილ ტატუნაშვილთან ერთად დაკვებულების ოკუპირებული ტერიტორიებიდან გასათავისუფლებლად. ამის შესახებ მინისტრის მოადგილემ დღეს, დაკავებიდან 17 დღეში ლევან ქუტაშვილისა და იოსებ პავლიაშვილის საქართველოს მიერ კონტროლირებად ტერირორიაზე გადმოსვლისას განაცხადა.

"საქართველოს შინაგან საქმეთა სამინისტრომ, სახელმწიფო უსაფრთხოების სამსახურთან და სხვა სახელმწიფო ინსტიტუტებთან ერთად, მაქსიმალური გააკეთა იმისთვის, რომ მომხდარიყო ამ ახალგაზრდების დროული გათავისუფლება. ისინი დღეს უკვე იმყოფებიან ჩვენს კონტროლირებად ტერიტორიაზე", - თქვა მინისტრის მოადგილემ.

22 თებერვალს არჩილ ტატუნაშვილთან ერთად დაკავებულ, ლევან ქუტაშვილსა და იოსებ პავლიაშვილს დაკავებიდან 17 დღის შემდეგ ოკუპირებული ახალგორიდან გამოსვლის უფლება მისცეს. თუმცა, ოკუპირებულ ცხინვალში გარდაცვლილი ტატუნაშვილის ცხედარი ისევ არ გადმოუსვენებიათ.