თბილისის მერი, კახა კალაძე თბილისის საკრებულოში მისვლაზე ოპოზიციის მოთხოვნას პასუხობს. მერის თქმით, ის კანონმდებლობის შესაბამისად მოქმედებს.

"ცოტა გაუგებარია ჯერ რატომ უნდა მივიდე, მე ვარ ხალხის მიერ არჩეული, მე შესაბამისად, უფლებამოსილებას უკვე შევუდექი. კანონის შესაბამისად ვიმოქმედე, გადავუგზავნე საკრებულოს, დღეს იმსჯელებენ და ალბათ იქნება მიღებული გადაწყვეტილება, დამტკიცებული იქნება და ორშაბათიდან ჩვენ შევუდგებით მუშაობას," - განაცხადა კალაძემ.

თბილისის საკრებულოს დეპუტატი ევროპული საქართველოდან გოკა გაბაშვილი ამბობს, რომ თბილისის ახლადარჩეულ მერს, კახა კალაძეს არ აქვს პასუხი, რატომ დარჩნენ თანამდებობებზე დავით ნარმანიას გუნდის წევრები. დეპუტატს ეს ჰგონია მიზეზი, რის გამოც მერი საკრებულოში საქალაქო სამსახურის ხელმძღვანელების დანიშვნას არ დაესწრება.

"კალაძის მიმართ მთავარი შეკითხვა იქნება საიდან შეარჩია შავბნელი, შავრაზმული, ჰომოფობიური, ქსენოფობიური წარმომადგენელი მერიის უსაფრთხოების უზრუნველსაყოფად. ასევე იქნება შეკითხვა კალაძის მიმართ, რატომ ვერ შეძლო ნარმანიასთვის სუს-ის მიერ მიჩენილი მოადგილის, ნიკოლეიშვილის გამოცვლა", - განაცხადა გაბაშვილმა.

ნაციონალური მოძრაობის წევრი, მარიკა დათუკიშვილი გაბაშვილის მოსაზრებას იზიარებს და ისიც ფიქრობს, რომ კახა კალაძეს კითხვებზე პასუხის გაცემა არ შეუძლია.

რამდენიმე დღეა მერიის უსაფრთხოების სამსახურის ხელმძღვანელის თანამდებობაზე წარდგენილ ნუგზარ ჭონქაძეზე ოპოზიციური პარტიების წარმომადგენლები ამბობენ, რომ კანდიდატი სიძულვილის ენით გამოირჩეოდა ფეისბუკში. კალაძეს კი სჯერა, რომ შერჩეული კანდიდატი საქმიანობას კარგად შეასრულებს და მას სუფთა წარსულის მქონედ ახასიათებს.

ჭონქაძემ 16 ნოემბერს დაადასტურა, რომ სულიკო კედელაშვილის ფსევდონიმით ფეისბუკანგარიში მას ეკუთვნოდა:

"ეს გვერდი შეიქმნა ამისთვის, საზოგადოებისთვის, რომელსაც სჭირდებოდა ასეთი ხისტი პოზიციის დაფიქსირება და ვერ აფიქსირებდა. მარტო მე კი არ ვაფიქსირებდი, იქ ძალიან ბევრი კომენტარებში აფიქსირებდა თავის აზრებს."