თბილისის არჩეული მერი, კახა კალაძე ახალ გუნდთან ერთად მუშაობას 13 ნოემბერს დაიწყებს. ამის შესახებ ინფორმაციას თბილისის მერიის პრესსამსახური ავრცელებს.

ამ დრომდე უცნობია ვინ იქნებიან თბილისის მთავრობის წევრები. მხოლოდ ისაა ცნობილი, რომ მოქმედი მერის მოადგილეებიდან მოლაპარაკებები მხოლოდ ირაკლი ლექვინაძესთან მიმდინარეობს.

თბილისის ახალარჩეული საკრებულოს პირველი სხდომა 14 ნოემბერს გაიმართება. სხდომის მოწვევის შესახებ განკარგულება ცენტრალურმა საარჩევნო კომისიამ 7 ნოემბერს გამართულ სხდომაზე მიიღო.

თბილისში მერის არჩევნებში ქართული ოცნების მერობის კანდიდატმა, კახა კალაძემ პირველივე ტურში მოიგო. მან ხმების 51,09 პროცენტი, 204 061 ხმა მიიღო.