ლატარიებისა და აზარტული თამაშობების მოწყობის შესახებ კანონში, შესაძლოა, ცვლილება შევიდეს და რეესტრში თამაშზე დამოკიდებულ პირთა სია შეიქმნას.

კანონპროექტის თანახმად: "თამაშზე დამოკიდებული პირი არის ფიზიკური პირი, რომელსაც გააჩნია დაუძლეველი სურვილი და დამოკიდებულება აზარტულ ან/და მომგებიან თამაშობებზე და რომელიც შეტანილია დამოკიდებულ პირთა სიაში მიუხედავად მისი შედეგისა".

პროექტის ინიციატორია ფინანსთა სამინისტრო და იგი 20 ოქტომბერს დარეგისტრირდა საქართველოს პარლამენტში.

განმარტებით ბარათში ვკითხულობთ, რომ კანონის მე-3 მუხლს დაემატა დამოკიდებულ პირთა სიის განმარტება, რომელიც მოიცავს აზარტულ ან მომგებიან თამაშობებზე დამოკიდებულ პირთა მონაცემთა ბაზას.

დამოკიდებულ პირთა სიაში პირის მონაცემების შეტანა თავად პირის მიმართვის საფუძველზე იქნება შესაძლებელი, რომელიც შესაბამის განაცხადს წარადგენს შემოსავლების სამსახურში.

ასევე მისი ოჯახის წევრი არის უფლებამოსილი სასამართლოს წესით მოითხოვოს პირის მონაცემების რეესტრში შეტანა.

თამაშზე დამოკიდებულ პირთა სიას შემოსავლების სამსახური შეადგენს და სიაში პირის შეყვანა განხორციელდება სამი წლის ვადით.

კანონპროექტის დამტკიცების შემთხვევაში, ნებართვის მფლობელი ვალდებული იქნება მოთამაშის ობიექტზე დაშვებამდე ან სისტემურ-ელექტრონული ფორმით თამაშში მონაწილეობამდე, გადაამოწმოს პირი შესაბამის რეესტრში და მისი არსებობის შემთხვევაში არ დაუშვას დამოკიდებული პირის სათამაშოდ.