ბათუმის მერიის ა(ა)იპ "საქალაქო ინფრასტრუქტურისა და კეთილმოწყობის სამმართველოს" მიერ 2024-2026 წლებში გამოცხადებულ საგზაო ტენდერებში სისტემური კორუფციის ნიშნები ჩნდება.

"საერთაშორისო გამჭვირვალობა — საქართველოს" კვლევის მიხედვით, 1 მილიონ ლარზე მეტი ღირებულების 117 მსხვილი სამშენებლო ტენდერიდან გეოგრაფიული სიახლოვის ბარიერი — "30 კმ რადიუსის წესი" (ასფალტის ქარხნის ფლობა ან მიწოდების ხელშეკრულება ობიექტიდან 30 კილომეტრში) — მხოლოდ ბათუმის მერიის 5 ტენდერში იქნა გამოყენებული.

TI წერს, რომ ამ ხელოვნური ფილტრით კონკურენცია შეიზღუდა და 70 მილიონ ლარზე მეტი ჯამური ღირებულების შესყიდვები 3-მა კომპანიამ როტაციით გადაინაწილა. სამიდან ორი კომპანია მმართველი პარტიის მსხვილი დონორია:

შპს "გზა": 100%-იანი წილის მფლობელია ქართული ოცნების დეპუტატი გიორგი ჭყონია. კომპანიას ჯამში 1.3 მილიარდ ლარზე მეტი ღირებულების ტენდერი აქვს მოგებული (93%-იანი გამარჯვების მაჩვენებლით), ხოლო მასთან დაკავშირებულ პირებს მმართველი პარტიისთვის 1 მილიონ ლარზე მეტი აქვთ შეწირული.
|
შპს "ბონდი-2009": მოიგო 5-დან 2 ტენდერი. კომპანიას ჯამში 292 მილიონი ლარის ტენდერები აქვს მოგებული, ხოლო მის ოთხი თანამფლობელიდან სამს (ნუკრი დოლიძე, ოთარ ფუტკარაძე, დავით დევაძე) ქართული ოცნებისთვის 605 000 ლარი აქვთ შეწირული.

TI-ის ცნობით, ამ სისტემის ყველაზე თვალსაჩინო მაგალითი შპს "გზის" მიერ მოგებული 29.2 მილიონი ლარის საგზაო ტენდერია, სადაც კომპანია ერთადერთი პრეტენდენტი იყო. ხელშეკრულების გაფორმებამდე 7 დღის განმავლობაში კომპანიასთან დაკავშირებულმა პირებმა ქართულ ოცნებას ჯამში 120 000 ლარი შესწირეს:

  • 6 მარტს მალხაზ დუმბაძემ (სამეთვალყურეო საბჭოს თავმჯდომარე) — 30 000 ლარი.
  • 10 მარტს ჯიმშერ ზოიძემ (წილის მმართველი) — 15 000 ლარი.

  • 11 მარტს ჯემალ ჭყონიამ (ბიზნეს-პარტნიორი) — 15 000 ლარი.

  • 12 მარტის გიორგი ჭყონიამ (მფლობელი, დეპუტატი) — 60 000 ლარი (ჩვეულებრივ წირავდა წლის მეორე ნახევარში).

ამის შემდეგ, 13 მარტის შპს "გზამ" 29,163,899 ლარიანი ხელშეკრულება გააფორმა.

TI წერს, რომ აღნიშნული ფაქტები კარგად ორგანიზებულ სისტემურ კორუფციაზე მიუთითებს, რომელიც კონკურენციას სპობს და ბიუჯეტს პარტიული ინტერესებისთვის იყენებს. TI აღნიშნავს, რომ მსგავს შემთხვევებზე სახელმწიფო უსაფრთხოების სამსახურმა და პროკურატურამ ეფექტური და მიუკერძოებელი გამოძიებით უნდა უპასუხონ.

სტატია სრულად იხილეთ აქ.