ტენერიფეში, ატლანტის ოკეანეში მდებარე კანარის არქიპელაგის ერთ-ერთ კუნძულზე, ჰანტავირუსის აფეთქების ცენტრში მოქცეული საკრუიზო გემიდან — MV Hondius — ათეულობით მგზავრი და ეკიპაჟის წევრია ევაკუირებული. გემზე ვირუსის შედეგად სამი ადამიანი გარდაიცვალა, ხოლო რვა დაინფიცირდა, რის შემდეგაც საერთაშორისო სამაშველო და ჯანდაცვის ოპერაცია დაიწყო. ამის შესახებ ინფორმაციას The Guardian ავრცელებს.

გემი კანარის კუნძულებზე კვირას, გამთენიისას ჩავიდა, ბორტზე 146 ადამიანით. ინფექციის გავრცელების შეჩერების მიზნით, მგზავრები და ეკიპაჟი რამდენიმე დღის განმავლობაში საკუთარ კაიუტებში იზოლაციაში იმყოფებოდნენ. მიუხედავად იმისა, რომ დანარჩენ მგზავრებს სიმპტომები არ აღენიშნებოდათ, ყველა მათგანის ჯანმრთელობა შეამოწმეს.

ევაკუაცია ორ დღეში განხორციელდა. მგზავრები და ეკიპაჟის წევრები სპეციალური ჩარტერული რეისებით საკუთარ ქვეყნებში გაამგზავრეს — მათ შორის დიდ ბრიტანეთში, აშშ-ში, საფრანგეთში, ესპანეთში, ნიდერლანდებში, გერმანიაში, კანადაში, თურქეთში, ირლანდიასა და ავსტრალიაში.

დიდ ბრიტანეთში დაბრუნებული 22 მოქალაქე სპეციალურ კარანტინში გადაიყვანეს, სადაც ისინი რამდენიმე დღე ექიმების მეთვალყურეობის ქვეშ იქნებიან, შემდეგ კი სახლში თვითიზოლაციას გააგრძელებენ. ბრიტანეთის ჯანდაცვის სამსახურის ცნობით, ამ ეტაპზე მათ შორის ინფიცირების სიმპტომები არ ფიქსირდება.

თუმცა, საფრანგეთის მთავრობამ დაადასტურა, რომ გემიდან დაბრუნებულ ერთ მოქალაქეს დაავადების სიმპტომები აღენიშნება და ის მკაცრ იზოლაციაშია მოთავსებული. აშშ-ის ჯანდაცვის დეპარტამენტის ინფორმაციით კი, ევაკუირებულ ორ ამერიკელს დამატებითი გამოკვლევები უტარდება — ერთს მსუბუქი სიმპტომები აქვს, მეორეს კი ვირუსის სუსტი PCR დადებითი პასუხი დაუდგინდა.

ჯანდაცვის მსოფლიო ორგანიზაციაში (WHO) აცხადებენ, რომ არსებული ვითარება ახალი პანდემიის საფრთხეს არ ქმნის. მათი განმარტებით, ჰანტავირუსი COVID-19-ის მსგავსად სწრაფად არ ვრცელდება და ძირითადად მხოლოდ ძალიან ახლო კონტაქტით გადადის. მიუხედავად ამისა, ვირუსის საინკუბაციო პერიოდი შესაძლოა რვა კვირამდეც გაგრძელდეს, რის გამოც ყველა ევაკუირებულ პირს ხანგრძლივი თვითიზოლაციის რეკომენდაცია მიეცა.

საერთაშორისო უწყებები ამ დრომდე აგრძელებენ იმ ადამიანების მოძიებასა და კონტროლს, რომლებმაც გემი ბოლო ერთი თვის განმავლობაში დატოვეს, რათა ვირუსის შესაძლო გავრცელება სრულად აღიკვეთოს.

ცნობისთვის, საკრუიზო გემ MV Hondius-ზე ჰანტავირუსის იშვიათი და საშიში შტამი დაფიქსირდა. ეპიდაფეთქებას, რომელიც ადამიანებს შორის ვირუსის გადადების რისკს შეიცავს, უკვე ემსხვერპლა 3 ადამიანი, მათ შორის ბრიტანეთის მოქალაქეებიც არიან.