აშშ-ში, კოლუმბიის ოლქის საოლქო სასამართლოს უფროსმა მოსამართლემ პოლ ფრიდმანმა არაკონსტიტუციურად ცნო თავდაცვის დეპარტამენტის პოლიტიკა, რომელიც ჟურნალისტებს პენტაგონში წვდომას უზღუდავდა. ამის შესახებ Reuters წერს.

2025 წლის სექტემბერში, აშშ-ის თავდაცვის დეპარტამენტის ჟურნალისტებს ეცნობათ, რომ პენტაგონში, თავდაცვის დეპარტამენტის შტაბ-ბინაში, წვდომის შესანარჩუნებლად მათ მოეთხოვებოდათ ხელი მოეწერათ ვალდებულებაზე, არ გამოაქვეყნონ ინფორმაცია, რომელიც დეპარტამენტის მიერ არ არის დამტკიცებული. ეს ცვლილებები ძალაში 2025 წლის ოქტომბერში შევიდა. აშშ-ის თავდაცვის მდივნის, პიტ ჰეგსეტის ოფისმა ამ ცვლილებების მიზეზად ეროვნული უსაფრთხოება დაასახელა.

2025 წლის დეკემბერში, The New York Times-მა (NYT) აშშ-ის თავდაცვის დეპარტამენტის წინააღმდეგ სარჩელი შეიტანა ვაშინგტონში, კოლუმბიის ოლქის სასამართლოში. მისი თქმით, პენტაგონში ჟურნალისტებისთვის წვდომის ახალი წესები არღვევს აშშ-ის კონსტიტუციის პირველ შესწორებას, რომელიც პრესის თავისუფლებას უზრუნველყოფს.

Reuters-ის ცნობით, მოსამართლე პოლ ფრიდმანმა თავის მსჯელობაში აღიარა ჯარებისა და სამხედრო გეგმების დაცვის მნიშვნელობა, თუმცა, აშშ-ის პრეზიდენტ დონალდ ტრამპის ვენესუელაში ბოლოდროინდელი “შეჭრის” გათვალისწინებით, იგი მიიჩნევს, რომ “უფრო მნიშვნელოვანია, ვიდრე ოდესმე, უზრუნველყოფილი იყოს საზოგადოების წვდომა ინფორმაციაზე, რომელიც ასახავს მთავრობის ქმედებებზე მრავალფეროვან შეხედულებებს”.

სასამართლოს გადაწყვეტილების კომენტირებისას, პენტაგონის პრესმდივანმა შონ პარნელმა განაცხადა, რომ აშშ-ის მთავრობა არ ეთანხმება მას და აპირებს დაუყოვნებლივ გაასაჩივროს იგი.

თავის მხრივ, NYT-ის წარმომადგენელმა ჩარლი სტადლანდერმა განაცხადა, რომ გადაწყვეტილება იცავს პრესის თავისუფლების უფლებას, რომელიც გარანტირებულია აშშ-ის კონსტიტუციით და “ადასტურებს NYT-ის და სხვა დამოუკიდებელი მედიის უფლებას, გააგრძელონ კითხვების დასმა საზოგადოების სახელით”.

"ამერიკელები იმსახურებენ გამჭვირვალობას იმის შესახებ, თუ როგორ მართავს მათი მთავრობა და რა ქმედებებს ახორციელებენ სამხედროები მათი სახელით და მათი გადასახადების გამოყენებით", — განაცხადა სტედლანდარმა 20 მარტს გამოქვეყნებულ განცხადებაში.

Reuters-ის ცნობით, პენტაგონის (პენტაგონის პრესის ასოციაციის) 56 გამოცემიდან მხოლოდ ერთმა დათანხმდა ხელი მოეწერა პიტ ჰეგსეთის სააგენტოს მიერ დაჟინებით დაკისრებულ პირობაზე. დანარჩენმა რეპორტიორებმა თავიანთი პრეს-საშვები ჩააბარეს.