"მთის ამბების" და "ღია სივრცის" ინფორმაციით, "ხარაგაულის სოფლებში ხემაღალსა და ღვერკში ბოლო სახლებიც შუაზე იპობა და იმარხება. ადამიანებს ნივთები ვეღარ გამოაქვთ. ნასახლარებამდე გზები აღარ არსებობს. მოსახლეობამ სოფლები იძულებით დატოვა. ეს ყველაფერი მოჰყვა ჩინეთის რკინიგზის 23-ე ბიუროს მიერ მთის ძირში გვირაბების აფეთქებებით გაყვანას. მანამდე ასეთივე საშიში პროცესები განვითარდა სოფელ ზვარეში".

"ღია სივრცის" ეთერში საზედამხედველო კომპანია ILF-ის ყოფილმა თანამშრომელმა აკაკი კიკნაძემ განაცხადა, რომ სარკინიგზო გვირაბი ხარაგაულში დარღვევებით აშენდა — "გვირაბის თავზე 7-8 მეტრიანი სიცარიელეებია დატოვებული, რომელიც წნევით, ბეტონით უნდა ამოევსოთ"; კონკრეტული მონაკვეთის შემოწმებისას კი აღმოაჩინა, რომ 35 კილო ასაფეთქებელი ნივთიერების ნაცვლად, 245 კილო ჰქონდათ გამოყენებული, მას შემდეგ, რაც აფეთქებების შეჩერება სცადა, სამსახურიდან დაითხოვეს.

"ქვიშხეთი-ზვარეს გვირაბის თავზე 7-8 მეტრიანი სიცარიელეებია დატოვებული, რომელიც წნევით, ბეტონით უნდა ამოევსოთ. მერე უნდა დამჯდარიყო თაღი. თაღს მაშინ აქვს ძალა, როცა ის რაღაცაზეა მიმჯდარი. ეს გვირაბი ასეა აშენებული. ერთი მანქანა მასალა არ არის შეტანილი, რაც უნდა დაიტკეპნოს და რაზეც ლიანდაგი უნდა დაიგოს.

სოფელი ბეჟათუბანი არ შეიძლება არსებობდეს გვირაბის თავზე, სადაც აფეთქებები მიმდინარეობდა. აფეთქების დროს ქანები 90 მეტრზე იბზარება. თან ამიერკავკასიის რკინიგზაზე ბეჟათუბანი ყველაზე მეწყერსაშიში ადგილია.

როცა შევამოწმე, კონკრეტულ მონაკვეთზე 35 კილო ასაფეთქებელი ნივთიერება უნდა გამოეყენებინათ. 245 კილო ჰქონდათ მიცემული. იმ დღეს აფეთქება გავაჩერებინე როგორც ზედამხედველმა, მაგრამ მეორე დღეს, დილითვე სამსახურიდან გამათავისუფლეს.

რკინიგზის დეპარტამენტში როდესაც იმართებოდა თათბირი, იქ აცხადებდნენ, რომ მთავარია, ნგრევა, ზიანი არ გახმაურდეს, არ მივიდეს ჟურნალისტებამდე. ვისაც უნდა წავიდეს სასამართლოში, მერიაში, მთავარია, მედია არ ჩართულიყო ამ საქმეში.

ყველა ფულს აკეთებდა. საბურღი მანქანით გვირაბის გაჭრის დროს არ იშოვება იმდენი ფული. ფული კეთდება ჩამონგრევაში, ზედმეტ სამუშაოებში, დამატებითი ხარჯების მოთხოვნაში.

გვირაბი 7 წელია აშენებულია და ვერ გახსნეს. ყოველი წლის 26 მაისს და 1-ელ სექტემბერს იხსნება, მაგრამ ვერ ხსნიან", — ამბობს აკაკი კიკნაძე ფორმულას ეთერში.