ერთიანი ნაციონალური მოძრაობის თავმჯდომარე თინა ბოკუჩავა პარტიის ლიდერებთან ერთად, ამერიკის შეერთებული შტატების სენატში, სენატის საგარეო კომიტეტის თავმჯდომარეს, სენატორ ჯიმ რიშს და ჰელსინკის კომისიის თავმჯდომარის სენატორ ვიკერის ოფისის წარმომადგენლებს შეხვდნენ.

სენატორებთან საუბრისას განიხილება საქართველო-აშშ-ს პარტნიორობის საკითხი, ივანიშვილის რეჟიმის კავშირები კრემლთან, ჩინეთთან და ირანთან. საუბარი პოლიტიკური პატიმრების საკითხს შეეხო.

ნაციონალური მოძრაობის თავმჯდომარის, თინა ბოკუჩავას თქმით, დასტურდება, რომ შეუძლებელია აშშ-საქართველოს ურთიერთობების გადატვირთვა მანამდე, სანამ საქართველოში პოლიტპატიმრები არიან და ქვეყანაში "ივანიშვილის რეჟიმი იღებს ავტოკრატიულ გადაწყვეტილებებს."

"დღეს შევხვდით სენატის საგარეო ურთიერთობათა კომიტეტის თავმჯდომარეს ჯიმ რიშს, რომელიც ერთ-ერთი ყველაზე გავლენიანი სენატორია, პრეზიდენტ დონალდ ტრამპთან დაახლოებული პირია, ის ასევე არის საქართველოს დიდი მეგობარი და არის საკვანძო ფიგურა
MEGOBARI აქტის გატანაში აშშ-ის სენატში. როგორც სახელმწიფო დეპარტამენტის განცხადებაში იყო აღნიშნული და ამაზე თანხმდება აღმასრულებელი და საკანონმდებლო ორგანო აშშ-ში, შეუძლებელია აშშ-საქართველოს ურთიერთობის გადატვირთვა მანამ, სანამ ქვეყანაში არიან პოლიტპატიმრები და სანამ ივანიშვილის რეჟიმი იღებს ავტოკრატიულ გადაწყვეტილებებს. აშშ საქართველოს ურთიერთობის გადატვირთვისთვის და აღდგენისთვის აუცილებელია რეჟიმის ცვლილება და ჩვენ საგარეო წნეხით და ჩვენი ბრძოლით ქვეყნის შიგნით ამ ცვლილებას აუცილებლად მოვიპოვებთ" — განაცხადა თინა ბოკუჩავამ.

შეგახსენებთ, მანამდე პარტიის ლიდერები "MEGOBARI აქტის" ინიციატორს, კონგრესმენ ჯო უილსონს შეხვდნენ.