ლევან ხაბეიშვილის ადვოკატის, გიორგი კონდახიშვილის განცხადებით საქმეში არსებულ პატაკში გდდ-ს სამი თანამშრომელი აცხადებს, რომ ოპოზიციონერი პოლიტიკოსის ინტერვიუს მოუსმინეს და თავი შეურაცხყოფილად იგრძნეს. გდდ-ს თანამშრომლების "შეფასებით", ეს პოლიციისთვის ქრთამის შეთავაზება იყო.

კონდახიშვილის განცხადებით, მისი დაცვის ქვეშ მყოფი არ ეთანხმება სუს-ის წარდგენილ მეორე ბრალდებას, რომ ის მოქალაქეებს ხელისუფლების ძალადობრივი დამხობისკენ მოუწოდებდა. ადვოკატის განმარტებით, საქმეში არსებულ ინტერვიუებში, ხაბეიშვილი მოქალაქეებს ხელისუფლების მშვიდობიანი დამხობისკენ მოუწოდებს.

"ლევან ხაბეიშვილს ბრალი წარუდგინეს სსკ-ის ორი მუხლით. ერთი მუხლით, მას ედავებიან იმას, რომ საჯაროდ მოუწოდებდა ხელისუფლების ძალადობით დამხობისკენ თითქოს, და მეორე — როდესაც საუბარი იყო საჯაროდ, ათი ათასობით პოლიციელისთვის ქრთამის შეთავაზებაზე. რა თქმა უნდა, ორივე ეს ბრალდება არის სამართლებრივად აბსურდული. საქმეში მტკიცებულებები, რაც მოვასწარით და გადავხედეთ, არის პოლიციელების პატაკები და მათი გამოკითხვის ოქმები, რომლებშიც გდდ-ს სამი თანამშრომელი აღნიშნავს, რომ მოისმინეს ლევანის ინტერვიუ საჯაროდ, სადაც საუბარი იყო ჯილდოზე, ეს მიიღეს შეურაცხყოფად და მათი შეფასებით, ეს არის პოლიციისთვის ქრთამის შეთავაზება.

რაც შეეხება მეორე ბრალდებას — საჯარო სივრცეში, ასევე სუს-ის თანამშრომელი აკეთებს პატაკს, რომ ლევან ხაბეიშვილი მოუწოდებს ხალხს მშვიდობიანი რევოლუციისკენ, მშვიდობიანი დამხობისკენ და ამ პატაკის საფუძველზე მას წარედგინა მეორე ბრალდება, რაც გულისხმობს ხელისუფლების ძალადობით დამხობას. თავისთავად, ჩვენ გავეცანით ბრალდებას, ლევანი არ დაეთანხმა. მიაჩნია, რომ ეს არის პოლიტიკური დაკვეთა და მის ქმედებაში, როგორც იურისტი, რა თქმა უნდა, ვადასტურებ, რომ არ არის არავითარი დანაშაულის შემადგენლობა. ველოდებით აღკვეთის ღონისძიების თაობაზე სასამართლო პროცესს, სადაც ვეცდებით მივაწოდოთ ჩვენი არგუმენტაცია სასამართლოს," — განაცხადა კონდახიშვილმა.

შეგახსენებთ, პროკურატურის განცხადებით, ლევან ხაბეიშვილს ბრალდება საქართველოს სსკ-ის 339-ე მუხლის მეორე ნაწილით და 317-ე მუხლით წარედგინა. 339-ე მუხლის მეორე ნაწილი გულისხმობს უკანონო ქმედების ჩასადენად მოხელისათვის ქრთამის (ფულის გადაცემის) დაპირებას, 317-ე მუხლი — საქვეყნოდ მოწოდებას სახელმწიფო ხელისუფლების დამხობისაკენ.
პროკურატურა ლევან ხაბეიშვილისთვის, აღმკვეთი ღონისძიების, სახით პატიმრობას მოითხოვს.

სუს-მა ენმ-ის ლიდერი ლევან ხაბეიშვილი საჯარო მოხელისთვის ქრთამის შეთავაზების ბრალდებით დააკავა. უწყება ხაბეიშვილს ერთ-ერთი ტელეკომპანიის ეთერში გაკეთებული განცხადების გამო ედავება, სადაც ოპოზიციური ლიდერი სამართალდამცავებს მმართველი პარტიის მითითებების არ შესრულებისკენ მოუწოდებს და სანაცვლოდ 200 000 დოლარს ჰპირდება.