დიდი ბრიტანეთის ევროპის მინისტრი, სტივენ დაუთი საქართველოში მიმდინარე მოვლენებს გამოეხმაურა. მან მმართველი პარტიის წარმომადგენლის ბლერ მაკდუგალის მიერ თემთა პალატიდან გაგზავნილ კითხვას უპასუხა, იმის შესახებ თუ რა შეფასება მისცა ბრიტანეთის საგარეო უწყებამ საქართველოში ოპოზიციონერი ლიდერების სისხლის სამართლის დევნისა და საზოგადოების რეპრესიების პოტენციურ შედეგებს. მის კომენტარს TV პირველი ავრცელებს.

სტივენ დაუთიმ, კითხვაზე საპასუხოდ ამ საკითხთან დაკავშირებით ბოლო ერთი თვის განმავლობაში გადადგმულ ნაბიჯებთან დაკავშირებით ბლერ მაკდუგალს დეტალური ანგარიში ჩააბარა. მან ხაზი გაუსვა საჯარო განცხადებებსა და პირად შეხვედრებს. მათ შორის, დაუთი იხსენებს ოცნების საგარეო საქმეთა მინისტრ მაკა ბოჭორიშვილთან შეხვედრასაც.

"სერიოზულად გვაწუხებს ქართველი ოპოზიციონერებისთვის ბოლო დროს გამოტანილი განაჩენი. ეს სასჯელი აშკარად პოლიტიკურად მოტივირებულია და მიზნად ისახავს მომავალ არჩევნებში ოპოზიციის მონაწილეობის დაბლოკვას. 23 ივნისს მე მოვუწოდე ქართულ ოცნებას, შეეწყვიტა სასამართლოების ბოროტად გამოყენება განსხვავებული აზრის ჩასახშობად და გაეთავისუფლებინა ყველა პოლიტიკური პატიმარი. ჩვენ კვლავ ყურადღებით ვაკვირდებით საქართველოში გაუარესებულ სიტუაციას.

1-ელ ივლისს მე ვუხელმძღვანელე საგანგებო შეხვედრას მსგავსი შეხედულებების მქონე ევროპელ დემოკრატიებთან საქართველოსთან დაკავშირებით, რათა შეგვეფასებინა სიტუაცია და გვემსჯელა როგორი უნდა იყოს ჩვენი რეაგირება. ასევე ჩვენმა ელჩმა საქართველოში ქართული ოცნების საგარეო საქმეთა მინისტრ ბოჭორიშვილს სამოქალაქო საზოგადოებაზე, მედიასა და არასამთავრობო ორგანიზაციებზე თავდასხმებთან დაკავშირებით ჩვენი წუხილი გადასცა," — განაცხადა სტივენ დაუთიმ.

დიდი ბრიტანეთის ევროპის მინისტრის თქმით, კვლავ განიხილავენ საპასუხო ნაბიჯებს და კვლავ მხარს უჭერენ საქართველოს ევროატლანტიკურ მისწრაფებებს.

"ჩვენ კვლავ განვიხილავთ სხვადასხვა ვარიანტს ჩვენს პარტნიორებთან ერთად, რათა ვუპასუხოთ ბოლო მოვლენებს. დიდი ბრიტანეთის მხარდაჭერა საქართველოს ევროატლანტიკური მისწრაფებების მიმართ მტკიცე რჩება, და ჩვენ მზად ვართ, დავუჭიროთ მხარი ქვეყნის დაბრუნებას ევროპულ ღირებულებებსა და დემოკრატიულ ნორმებთან", — აღნიშნა სტივენ თაუთიმ.