ვოლოდიმირ ზელენსკის მიერ იშვიათი მინერალების შეთანხმების ხელმოწერამდე 1 დღით ადრე, 27 თებერვალს, აშშ-ის პრეზიდენტი, დონალდ ტრამპი, ბრიტანეთის პრემიერ კირ სტარმერს შეხვდა. სტარმერამდე, ტრამპთან ოფიციალური შეხვედრა გამართა საფრანგეთის პრეზიდენტმა ემანუელ მაკრონმაც. ევროპული ქვეყნების ლიდერები აშშ-ის პრეზიდენტთან ევროპისა და შეერთებული შტატების ურთიერთობის მოსაგვარებლად, სამომავლო გეგმების განსახილველად და უკრაინის ომთან დაკავშირებული საკითხების შესათანხმებლად ჩავიდნენ.

შეხვედრაზე რამდენიმე მნიშვნელოვანი კითხვა დაისვა, რომელთაც ლიდერებმა საინტერესო პასუხები გასცეს. შეხვედრის დასაწყისში დონალდ ტრამპმა განაცხადა, რომ დაწმუნებულია, რომ უკრაინა და რუსეთი სამშვიდობო შეთანხმებას მიაღწევენ — "ჩვენ ეს შეგვიძლია და ამას ვიზამთ", — განაცხადა ტრამპმა.

შეხვედრის მიმდინარეობისას, ტრამპმა განაცხადა, რომ ევროპული ქვეყნები, რომლებიც უკრაინას ეხმარებოდნენ, "თავიანთ ფულს უკან იღებენ", თუმცა კირ სტარმერმა განაცხადა, რომ ეს ასე არ არის და ბრიტანული დახმარების დიდი ნაწილი უკრაინას უსასყიდლოდ გადაეცა.

ტრამპისა და სტარმერის შეხვედრას არ ჩაუვლია კომიკური ეპიზოდის გარეშეც. BBC-ის ჟურნალისტის კითხვაზე, მიიჩნევს თუ არა ზელენსკის ისევ დიქტატორად, ტრამპმა უპასუხა: "მე ვთქვი, რომ ზელენსკი დიქტატორია? ვერ დავიჯერებ, რომ ამას ვიტყოდი".

მხარეები შეეხნენ ბრიტანეთის მზადყოფნასაც, რომ უკრაინაში სამშვიდობო ძალები გაგზავნოს — ჟურნალისტმა დონალდ ტრამპს ჰკითხა, რას იზამს აშშ თუ რუსეთი ბრიტანელ სამშვიდობოებს დაესხმება თავს, რაზეც ტრამპმა უპასუხა, რომ ბრიტანელებს საკუთარ თავზე ზრუნვა კარგად შეუძლიათ.

"იცით, მე შემიმჩნევია, რომ ბრიტანელებს დახმარება დიდად არ სჭირდებათ — მათ საკუთარ თავზე ზრუნვა კარგად შეუძლიათ. ეს შეიძლება კითხვის არიდებად ჟღერდეს, თუმცა არ არის. ბრიტანელები ყოველთვის იყვნენ შესანიშნავი ჯარისკაცები, მათ ჰყავთ შესანიშნავი არმია და თავის დაცვა შეუძლიათ, თუმცა თუ დახმარება დასჭირდებათ, მე ყოველთვის ბრიტანელების გვერდით ვიქნები", — განაცხადა დონალდ ტრამპმა.

ამ კითხვას პასუხი გასცა კირ სტარმერმაც და უპასუხა, რომ აშშ-ისა და ბრიტანეთის ალიანსი მსოფლიოს ისტორიაში საუკეთესოა.

"ჩვენი ქვეყნები ყოველთვის ერთმანეთის გვერდით იდგნენ, ამიტომ არის ეს, ჩემი აზრით, ყველაზე დიდებული ალიანსი განვითარებისა და უსაფრთხოებისთვის, რომელიც მსოფლიოს ოდესმე უნახავს", — განაცხადა ბრიტანეთის პრემიერმა.

შეხვედრაზე კირ სტარმერმა უპასუხა აშშ-ის ვიცე პრეზიდენტ ჯეი დი ვენსსაც, რომელმაც ევროპა არაერთხელ დაადანაშაულა სიტყვის თავისუფლების შეზღუდვაში. ბრიტანეთის პრემიერმა განაცხადა, რომ გაერთიანებულ სამეფოში არსებული სიტყვის თავისუფლების დონით მხოლოდ ამაყობს.

ხვალ, 28 თებერვალს დონალდ ტრამპი უკრაინის პრეზიდენტ ვოლოდიმირ ზელენსკის შეხვდება და ორი ქვეყნის პრეზიდენტები გააფორმებენ ხელშეკრულებას იშვიათი ლითონებისა და უკრაინის აღდგენის შესახებ.