24 თებერვალს აშშ-ის პრეზიდენტი დონალდ ტრამპი საფრანგეთის პრეზიდენტ ემანუელ მაკრონს თეთრ სახლში, უკრაინაში რუსეთის აგრესიასა და მიმდინარე სამშვიდობო მოლარაპაკებებზე სასაუბროდ შეხვდა.

დონალდ ტრამპმა შეხვედრაზე დაადასტურა, რომ აშშ და უკრაინა ძალიან ახლოს არიან იშვიათი მინერალების შეთანხმების მიღწევასთან, რომლის გამოც, გასულ კვირას დონალდ ტრამპსა და ვოლოდიმირ ზელენსკის შორის ურთიერთობა იმდენად დაიძაბა, რომ აშშ-ის პრეზიდენტმა უკრაინის პრეზიდენტს "დიქტატორიც" კი უწოდა.

ასევე იხილეთ: ტრამპმა ზელენსკი დიქტატორად მოიხსენია და არჩევნების დანიშვნისკენ მოუწოდა

ტრამპმა განაცხადა ისიც, რომ, შესაძლოა მიმდინარე ან შემდეგ კვირას ვოლოდიმირ ზელენსკისაც შეხვდეს აღნიშნული შეთანხმების ხელმოსაწერად.

"მას შეუძლია ამ ან შემდეგ კვირას მოვიდეს ხელშეკრულებაზე ხელმოსაწერად, რაც ძალიან კარგი იქნებოდა", — განაცხადა ტრამპმა.

აშშ-ის პრეზიდენტი არ გამორიცხავს ვლადიმერ პუტინთან პირისპირ შეხვედრასაც.

ემანუელ მაკრონმა განაცხადა, რომ ევროპა მზად არის, მისცეს უკრაინას უსაფრთხოების გარანტიები, მათ შორის სამშვიდობო ძალებიც ცეცხლის შეწყვეტის შემთხვევაში. ტრამპი დაეთანხმა ევროპული ქვეყნების სამშვიდობოების გაგზავნას და განაცხადა ისიც, რომ ამასთან დაკავშირებით პუტინს ესაუბრა და ის ამ შეთავაზებას მიიღებს.

კითხვაზე, უნდა დაუთმოს თუ არა ტერიტორიები უკრაინამ რუსეთს მშვიდობის მისაღწევად, ტრამპმა განაცხადა, რომ "ამას ვნახავთ" და აღნიშნა, რომ მოლაპარაკებები მხოლოდ ახლა იწყება.

ტრამპმა განაცხადა ისიც, რომ თუ ლიდერები "ჭკვიანები" არ იქნებიან, შესაძლოა საქმე მესამე მსოფლიო ომამდეც მივიდეს:

"ვფიქრობ, უკრაინაში ომი შეიძლება ძალიან მალე დასრულდეს, რამდენიმე კვირაში, თუ ჭკვიანები ვიქნებით. თუ ჭკვიანები არ ვიქნებით, ეს გაგრძელდება. ეს ჩვენ არ გვინდა. შეიძლება მესამე მსოფლიო ომში გადაიზარდოს და არც ეს გვინდა", — განაცხადა აშშ-ის პრეზიდენტმა.

ემანუელ მაკრონი გახდა პირველი ევროპელი ლიდერი, რომელიც დონალდ ტრამპს ესტუმრა მეორე ვადით პრეზიდენტად არჩევის შემდეგ. პრეზიდენტების შეხვედრა 1 საათსა და 45 წუთს გაგრძელდა, მოგვიანებით კი ორივე ლიდერი დიდი შვიდეულის (G7) ონლაინ-შეხვედრას დაესწრო.

მიმდინარე კვირას დონალდ ტრამპს შეხვდება დიდი ბრიტანეთის პრემიერმინისტრი კეირ სტარმერიც, რომელიც ეცდება, დაარწმუნოს აშშ-ის პრეზიდენტი, რომ რუსეთთან მოლაპარაკებებში ნაჩქარევად არ იმოქმედოს და პროცესში ევროპა და უკრაინაც ჩართოს.