"საქართველოში მზარდი რეპრესიებია, ქართული ოცნების ხელისუფლების პირობებში გაკეთდა მკაფიო, არამეგობრული განცხადებები დასავლური, და განსაკუთრებით, ამერიკის საგარეო პოლიტიკის შესახებ", — ამის შესახებ "ატლანტიკური საბჭოს" ევრაზიის ცენტრის დირექტორმა და აშშ-ის ყოფილმა ელჩმა უკრაინასა და უზბეკეთში, ჯონ ჰერბსტმა ამერიკის ხმასთან განაცხადა.

მისი თქმით, ახლა საქართველო-აშშ-ს ურთიერთობები ყველაზე დაბალ ნიშნულზეა.

"ამერიკა-საქართველოს ურთიერთობები სტაბილურად არასწორი მიმართულებით მიდის ბოლო რამდენიმე წლის განმავლობაში. გარდა იმისა, რომ საქართველოში მზარდი რეპრესიებია, „ქართული ოცნების“ ხელისუფლების პირობებში გაკეთდა მკაფიო, არამეგობრული განცხადებები დასავლური, და განსაკუთრებით, ამერიკის საგარეო პოლიტიკის შესახებ. ვხედავთ ერთგვარ დაჩოქებას, მოსკოვის მოთხოვნებისა, თუ პოზიციების მიმართაც. ეს საკმაოდ გასაოცარი და ძალიან სამწუხაროა. ჩვენი ურთიერთობები ალბათ ყველაზე დაბალ ნიშნულზეა, რაც კი ოდესმე ყოფილა, 90-იანი წლების დასაწყისიდან მოყოლებული მაინც", — თქვა დიპლომატმა.

მისი თქმით, ის ფაქტი, რომ დონალდ ტრამპის ინაუგურაციაზე არავინაა მიწვეული პარტია ქართული ოცნებიდან იმაზე მეტყველებს, რომ "მომავალ ადმინისტრაციას, ისევე როგორც მიმავალ ადმინისტრაციას, ესმის, რომ ქართული ოცნების მთავრობა დისკრედიტებულია".

დიპლომატი საქართველოში ჩატარებულ საპარლამენტო არჩევნებსაც გამოეხმაურა და თქვა, რომ ბაიდენის ადმინისტრაციას და ევროპის ბევრ მთავრობას "ნელი რეაგირება ჰქონდათ, მაგრამ ისინი სერიოზულად აკრიტიკებენ ქართული ოცნების რეპრესიებს".

"ბაიდენის ადმინისტრაციას და ევროპის ბევრ მთავრობას ნელი რეაგირება ჰქონდა გასულ შემოდგომაზე, საქართველოს არჩევნებში სერიოზულ დარღვევებზე და არ გამოუთქვამს საბოლოო პოზიცია ამ არჩევნების შედეგებზე. მაგრამ, ისინი სერიოზულად აკრიტიკებდნენ ქართული ოცნების რეპრესიებს, რაც დაახლოებით, ბოლო ოთხი კვირის განმავლობაში ხდება და რაც იმ ქართველების წინააღმდეგაა მიმართული, ვინც ამ არჩევნების თავისებურებებსა და საქართველოს მთავრობის გადაწყვეტილებას აპროტესტებს- უარი თქვას ევროკავშირში გაწევრიანების მოლაპარაკებებზე", — ამბობს ჰერბსტი.

დიპლომატი აცხადებს, რომ არჩევნებში დარღვევების გამო, ბიძინა ივანიშვილი დაასანქცირეს, მაგრამ იგივე არ გააკეთეს ირაკლი კობახიძის შემთხვევაში, რომელიც, ნათელია, რომ "ივანიშვილის უმცროსი პარტნიორია ამ ნეგატიურ ქმედებებში".

"საარჩევნო დარღვევები მკაფიოდ, უფრო მკაცრი ენით უნდა დაეგმოთ. იმ რეპრესიების ლოდინის ნაცვლად, რაც მოხდა [არჩევნების შემდეგ], ამ არჩევნებში დარღვევების გამო, სანქციები უნდა დაეწესებინათ. სანქციების დაწესება როდესაც დაიწყეს, მართალია ბიძინა ივანიშვილი დაასანქცირეს, მაგრამ იგივე არ გააკეთეს ირაკლი კობახიძის შემთხვევაში, რომელიც, ნათელია, რომ როგორც მინიმუმ ივანიშვილის უმცროსი პარტნიორია ამ ნეგატიურ ქმედებებში.

…ვფიქრობ, ეს ცვლილებების ნაწილი იქნება. თუმცა, ივანიშვილი ვერ იმუშავებს თავისი მთავარი "ლეიტენანტების" გარეშე. ასე რომ, რეპრესიების მთავარი აღმასრულებლის, კობახიძისთვის სანქციების არდაწესება, [ამერიკის საქართველოსადმი არსებული] პოლიტიკის პრობლემაა. და მხოლოდ კობახიძეზე არაა საუბარი, არსებობენ სხვა ადამიანები მინისტრების, მინისტრების მოადგილეების დონეზე, რომლებიც რეპრესიებსა და არჩევნების გაყალბებაში იყვნენ ჩარეული და ისინიც უნდა დასანქცირდნენ", — განაცხადა ჯონ ჰერბსტმა.