ლიბერალური ფაშიზმი არ არსებობს. არსებობს სწორი და არასწორი, – ასე უპასუხა ჯგუფ "მგზავრების" საზოგადოებასთან ურთიერთობის მენეჯერმა ნინი დედალამაზიშვილმა თბილისის მერიის განცხადებას, სადაც ნათქვამი იყო, რომ მგზავრებმა ლიბერალური ფაშიზმის ბულინგს ვერ გაუძლო და ამიტომ გააუქმა მერიის კონცერტი.

"ლიბერალური ფაშიზმი არ არსებობს.

არსებობს სწორი და არასწორი.

ჩვენი მომავალი ევროპაშია და ვერანაირი გლობალური ომის პარტიის შიშით ამ სულისკვეთებას ვერ შეაჩერებთ", — წერს ნინი დედალამაზიშვილი.

მერიის განცხადებაში ნათქვამი იყო, რომ 20 ოქტომბერს, ზღვისუბნის პარკის გახსნის ღონისძიებაზე ჯგუფ მგზავრების კონცერტი არ შედგება. მერია განმარტავს, რომ პარკის გახსნასთან დაკავშირებული კონცერტი მაინც შედგება და ღონისძიებაზე მოქალაქეებს იწვევს.

"სამწუხაროა, რომ "მგზავრებმა" ვერ გაუძლო იმ ბულინგს, რაც ლიბერალური ფაშიზმის წარმომადგენლებმა მათ წინააღმდეგ მოაწყვეს.

ამ ფაქტით კიდევ ერთხელ დასტურდება, რამდენად მზად არიან ე.წ რადიკალები, ყველაფერი გააკეთონ საკუთარი ქალაქის და ქვეყნის ინტერესების საწინააღმდეგოდ", — ნათქვამია მერიის მიერ გავრცელებულ განცხადებაში.

"მგზავრების" გადაწყვეტილებას დღეს თბილისის მერი, კახა კალაძეც გამოეხმაურა და ჟურნალისტებთან ირონიანარევი ხუმრობით თქვა, რომ თვითონ იმღერებს კონცერტზე.