მმართველი პარტიის ქართული ოცნების თბილისის მერობის კანდიდატი, კახა კალაძე ამბობს, რომ თბილისში, ეკოლოგიური მდგომარეობის გასაუმჯობესებლად, უნდა ამოქმედდეს ავტომობილების სავალდებულო ტექდათვალიერება.

საზოგადოებრივი ტრანსპორტის განვითარების კუთხით, კახა კალაძე, მისი არჩევის შემთხვევაში, ამომრჩეველს მეტროს მოდერნიზაციას, საბაგირო გზების განვითარებასა და ელექტრო მობილების პოპულარიზაციას ჰპირდება.

კახა კალაძე მისი ოპონენტების ინიციატივას ცენტრალური პარკის შექმნის შესახებ, იწუნებს და ამბობს, რომ მხოლოდ ერთი ცენტრალური პარკის შექმნა არ არის საკმარისი თბილისისთვის, მისი განლაგებიდან და პერსპექტივაში ურბანული განვითარების გეგმიდან გამომდინარე.

მერობის კანდიდატი სამშენებლო რეგულაციების გამკაცრების პირობას დებს, ასევე ამბობს, რომ მტკვრის მიდამოებში არსებულ ზონებზე დასასვენებელ პარკებს მოაწყობს და თბილისში ნარჩენების შეგროვება-გადამუშავების სისტემას დანერგავს.