უკრაინული მედიის ინფორმაციით, ვოლოდიმირ ზელენსკიმ ფრაქცია „ხალხის მსახურის“ სხდომაზე საგარეო საქმეთა მინისტრ, დიმიტრი კულებას გადადგომასთან დაკავშირებით განცხადება გააკეთა.

ზელენსკის თქმით, კულებას „იარაღის მიწოდების ხელშეწყობისთვის საკმარისი ენერგია არ აქვს“.

მან მინისტრთა კაბინეტში განხორციელებულ სხვა ცვლილებებზეც ისაუბრა. ზელენსკის თქმით, ის კმაყოფილია ევროპულ და ევროატლანტიკურ სტრუქტურებში ინტეგრაციის საკითხებში ყოფილი ვიცე-პრემიერის, ოლგა სტეფანიშინას მუშაობით და ამიტომ მას მეტ შესაძლებლობებს სთავაზობს.

შეგახსენებთ, რომ უკრაინის საგარეო საქმეთა მინისტრმა დიმიტრი კულებამ თანამდებობის დატოვების შესახებ განცხადება 4 სექტემბერს დაწერა.

მისი მოთხოვნა პოსტის დატოვების შესახებ უკრაინის რადამ დღეს დააკმაყოფილა. ინფორმაცია უკრაინულმა მედია ფრაქცია ხალხის ხმის დეპუტატ, იაროსლავ ჟელეზნიაკზე დაყრდნობით გაავრცელა. გადაწყვეტილებას ხმა 240-მა დეპუტატმა მისცა.

უკრაინული მედია წერს, რომ კულებას ყველაზე სავარაუდო შემცვლელად საგარეო საქმეთა მინისტრის პირველი მოადგილე, ანდრეი სიბიგა განიხილება.

კულებას გარდა, გადადგომაზე განცხადებები დაწერეს უკრაინის სტრატეგიული მრეწველობის, იუსტიციისა და გარემოს დაცვისა და ბუნებრივი რესურსების მინისტრებმაც.

რადამ მხარი დაუჭირა: ევროპულ და ევროატლანტიკურ სტრუქტურებში ინტეგრაციის საკითხებში ვიცე-პრემიერ ოლგა სტეფანიშინას გადაყენებას, სტრატეგიული მრეწველობის მინისტრ ალექსანდრე კამიშინის გადადგომას, იუსტიციის მინისტრ დენის მალიუსკას და გარემოს დაცვისა და ბუნებრივი რესურსების მინისტრ რუსლან სტრელესის თანამდებობებიდან გათავისუფლებას.

უკრაინის უმაღლესმა რადამ მხარი არ დაუჭირა ირინა ვერეშჩუკის განცხადებას ვიცე პრემიერ-მინისტრის, უკრაინის დროებით ოკუპირებული ტერიტორიების რეინტეგრაციის მინისტრის თანამდებობიდან გათავისუფლების შესახებ.