უზბეკეთის ოთხი მოქალაქის სავარაუდო საკვებისმიერი მოწამვლის შესახებ, სურსათის ეროვნული სააგენტოს აჭარის რეგიონულ სამმართველოში შეტყობინება შევიდა.

ინფორმაციის მიღებისთანავე სურსათის ეროვნულმა სააგენტომ დაიწყო მოკვლევა, რაზეც სახელმწიფო კონტროლი განხორციელდა ქობულეთის ერთ-ერთ სასტუმროში "magnetic beach resorts", სადაც უცხო ქვეყნის მოქალაქეები ცხოვრობდნენ და რესტორანში "ლურჯი ტალღა", სადაც მიირთვეს ბათუმის თევზის ბაზარში შეძენილი, თერმულად დაუმუშავებელი ზღვის პროდუქტები.

არაგეგმური ინსპექტირებისას, სასტუმროს სამზარეულოში დაფიქსირდა ეტიკეტირების წესის დარღვევა, რის გამოც ბიზნესოპერატორი დაჯარიმდა 500 ლარით — სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის 66-ე მუხლის მე-6 ნაწილის შესაბამისად.

სახელმწიფო კონტროლი განხორციელდა ბათუმის თევზის ბაზარშიც ინდივიდუალური მეწარმის კუთვნილ სარეალიზაციო ობიექტში, სადაც ლაბორატორიული კვლევისთვის აიღეს ზღვის პროდუქტების (ხამანწკები) ნიმუშები.

მიკრობიოლოგიური კვლევის შედეგად, ხუთივე ნიმუშში გამოვლინდა პათოგენური მიკროორგანიზმი Salmonella spp, ხოლო ერთში — ნაწლავის ჩხირის ბაქტერია E.coli.

ბიზნესოპერატორი სურსათის/ცხოველის საკვების უვნებლობის, ვეტერინარიისა და მცენარეთა დაცვის კოდექსის 66-ე მუხლის 3 ნაწილის შესაბამისად, დაჯარიმდა — 1000 ლარით; ასევე, დაევალა სურსათის ბაზარზე განთავსების აღკვეთა ან/და ბაზარზე უკვე განთავსებული სურსათის ამოღება, დასაწყობება, რაოდენობის აღრიცხვა და მიღებული ზომების თაობაზე სააგენტოს დაუყოვნებლივ ფორმირება.

ობიექტში სარეალიზაციო განთავსებული ზღვის პროდუქტები დაულუქა და სურსათის ეროვნული სააგენტოს უფლებამოსილი პირების ზედამხედველობით განადგურდება.