თელავის მუნიციპალიტეტში მომხდარი მკვლელობის საქმეზე პროკურატურამ ერთ პირს ბრალი წარუდგინა.

ბრალდებულმა 24 ივლისს, ცეცხლსასროლი იარაღით ორი თანასოფლელი დაჭრა და მიიმალა.

დაზიანებების შედეგად ერთი დაზარალებული ადგილზე, ხოლო მეორე — საავადმყოფოში გარდაიცვალა.

მოკლული კაცები 29 და 52 წლისები არიან.

ასევე, მკვლელი და მისი ერთ-ერთი მსხვერპლი მეგობრები იყვნენ.

პროკურატურა ამბობს, რომ იმ დღეს, ბრალდებული, სოფელ ლაფანყურში მართლსაწინააღმდეგოდ ატარებდა მასზე შენახვის უფლებით რეგისტრირებულ ორ ცეცხლსასროლ იარაღს.

კაცს დაუსწრებლად წარუდგინეს ბრალდება, რომელიც დამამძიმებელ გარემოებებში განზრახ მკვლელობისა და ცეცხლსასროლი იარაღის მართლსაწინააღმდეგოდ ტარებას ითვალისწინებს.

სასჯელი თექვსმეტიდან ოც წლამდე, ან — უვადო თავისუფლების აღკვეთას ითვალისწინებს.

თელავის რაიონულმა სასამართლომ ბრალდებულს აღკვეთის ღონისძიების სახით პატიმრობა შეუფარდა და მის მიმართ გამოცხადებულია ძებნა.