პატრიოტთა ალიანსის წევრი და საქართველოს პარლამენტის დეპუტატი, ნატო ჩხეიძე უარყოფს, რომ რუსეთის დუმის დეპუტატები თბილისში დაპატიჟეს. ამის შესახებ ჩხეიძემ ტელეკომპანია პირველის გადაცემა რეაქციაში განაცხადა:

"დიახ, ჩვენ, ადა მარშანია, გიორგი ლომია და მე ვიყავით შეხვედრაზე მოსკოვში, ჩვენ გვქონდა საუბარი შემდგომ შეხვედრებზე, მაგრამ იმ კონტექსტის მიხედვით, რასაც ჩვენ იქ ვსაუბრობდით, არ ყოფილა ასე - ჩვენ ჩამოვედით და მერე თქვენ ჩამოხვალთ. შემდგომი შეხვედრებიც უნდა გაიმართოს ისევ მოსკოვში. ასეთი იყო ჩვენი იქ ყოფნის ფორმატი."

ნატო ჩხეიძე თავის ორ კოლეგასთან, გიორგი ლომიასთან და ადა მარშანიასთან ერთად რუსეთის დუმის დეპუტატებს 11 ივლისს შეხვდნენ. შეხვედრის შემდეგ მარშანიამ განაცხადა, რომ რუს დეპუტატებს რუსეთ-საქართველო-ნატოს ფორმატის შექმნა შესთავაზეს. მოგვიანებით რუსული გაზეთი, იზვესტია, ლეონიდ კალაშნიკოვზე დაყრდნობით იუწყებოდა, რომ ქართველმა კოლეგებმა რუსი დეპუტატები თბილისში დაპატიჟეს. "აუცილებლად გავემგზავრებით თბილისში", - ამბობდა კალაშნიკოვი გაზეთთან.