მოკლედ: დიდმა ბრიტანეთმა მიანიშნა, რომ შესაძლოა, სამხედრო მოქმედებები დაიწყონ იემენის ჰუსიტი მებრძოლების წინააღმდეგ, მას შემდეგ, რაც მათ წითელ ზღვაში გემებზე ყველაზე დიდი თავდასხმა მოიგერიეს.

• სამშაბათს ღამით ჩამოაგდეს 21 დრონი და რაკეტა, რომლებიც ირანის მხარდაჭერილი ჯგუფის მიერ იყო ნასროლი.

გაეროს რეზოლუცია თავდასხმების წინააღმდეგ

გაეროს უშიშროების საბჭომ ოთხშაბათს მიიღო რეზოლუცია ჰუსიტების თავდასხმების დაუყოვნებლივ შეწყვეტის მოთხოვნით.

• რეზოლუციის ტექსტი მხარს უჭერს გაეროს წევრი ქვეყნების უფლებას, დაიცვან საკუთარი გემები.
• გაეროს რეზოლუციაში წერია, რომ ჰუსიტებმა დაუყოვნებლივ უნდა შეწყვიტონ ყველა თავდასხმა, რომელიც აფერხებს მსოფლიო ვაჭრობას და ძირს უთხრის ნავიგაციის უფლებებს და თავისუფლებებს.
• რეზოლუციას მხარი 11-მა ქვეყანამ დაუჭირა, თავი შეიკავეს რუსეთმა, ჩინეთმა, მოზამბიკმა და ალჟირმა.

ჰუსიტების სპიკერმა, მოჰამედ ალი ალ-ჰუსიმ რეზოლუციას "პოლიტიკური თამაში" უწოდა. დაჯგუფება ამბობს, რომ თავს ესხმის ისრაელთან დაკავშირებულ ხომალდებს, ღაზაში მიმდინარე ომის გამო.

თავდასხმა ამერიკულ გემზე

ჰუსიტებმა განაცხადეს, რომ მათი სამიზნე, სამშაბათს, გახდა ამერიკული ხომალდი, რომელიც ისრაელს ეხმარებოდა. 19 ნოემბრის შემდეგ, ეს იყო 26-ე თავდასხმა კომერციულ გემებზე წითელ ზღვაში.

• აშშ-ის შეიარაღებული ძალების ცნობით, ირანული დრონები, გემთსაწინააღმდეგო ფრთოსანი და ბალისტიკური რაკეტები, იემენის ჰუსიტების მიერ კონტროლირებადი ტერიტორიიდან, ადგილობრივი დროით, დაახლოებით, 21:15 საათზე გაისროლეს.
• ამერიკულმა საბრძოლო თვითმფრინავებმა ჩამოაგდეს 18 დრონი, 2 ფრთოსანი რაკეტა და ერთი ბალისტიკური რაკეტა.

შემთხვევის შედეგად არავინ დაშავებულა.

რა რეაქცია ჰქონდა დასავლეთს

მოგვიანებით, ჰუსიტების სამხედრო ძალების წარმომადგენელმა, იაჰია ალ-სარეამ დაადასტურა, რომ ოპერაცია მათმა ძალებმა ჩაატარეს "დიდი რაოდენობით ბალისტიკური და გემთსაწინააღმდეგო რაკეტებითა და დრონებით".

• შეფსმა თქვა, რომ გაერთიანებულმა სამეფომ და მისმა მოკავშირეებმა არაერთხელ განაცხადეს, რომ ეს არალეგალური თავდასხმები სრულიად მიუღებელია და თუ გაგრძელდება, ჰუსიტებს პასუხისგება მოუწევთ.
• "ჩვენ მივიღებთ საჭირო ზომებს უდანაშაულო ადამიანების სიცოცხლისა და გლობალური ეკონომიკის დასაცავად“, — დასძინა მან.
• მოგვიანებით, თავდაცვის მდივანმა სატელევიზიო ინტერვიუში თქვა, რომ ირანი დგას "იმ ცუდი მოვლენების უკან, რაც რეგიონში ხდება" და გააფრთხილა ისლამური რესპუბლიკა და ჰუსიტები, რომ ამ ყველაფერს მოჰყვება "შედეგები", თუ გემებზე თავდასხმები არ შეწყდება.

კითხვაზე, შესაძლებელია თუ არა, დასავლეთის შეიარაღებული მოქმედებები დაიწყოს იემენში ჰუსიტების ობიექტების წინააღმდეგ, ან ირანში, შეფსმა თქვა:

• "არ შემიძლია დეტალებზე საუბარი, თუმცა საერთო განცხადებაში, რომელიც ჩვენ გამოვაქვეყნეთ, ნათქვამია, რომ თუ ეს [თავდასხმები] არ შეჩერდება, მოჰყვება ჩვენი ქმედებები. ასე რომ, ვშიშობ, ყველაზე მარტივი რამ, რაც შემიძლია ვთქვა, არის —"დააკვირდით ამ ტერიტორიას".

"საერთო განცხადებაში" ის გულისხმობდა განცხადებას, რომელიც 1 კვირის წინ გაერთიანებულმა სამეფომ, აშშ-მა, ავსტრალიამ, ბაჰრეინმა, ბელგიამ, კანადამ, დანიამ, გერმანიამ, იტალიამ, იაპონიამ, ახალმა ზელანდიამ, სამხრეთ კორეამ და სინგაპურმა გამოაქვეყნეს. მოკავშირეებმა გასულ თვეში დაიწყეს ოპერაცია, წითელ ზღვაში გემების დასაცავად.

ისინი აღნიშნავენ, რომ თავდასხმები პირდაპირ საფრთხეს უქმნის ნაოსნობის თავისუფლებას, რომელიც გლობალურ ვაჭრობაში უმნიშვნელოვანეს როლს ასრულებს.

მსგავსი: თავდასხმები წითელ ზღვაში — ვინ არიან ჰუსიტები და რატომ ბომბავენ გემებს

ამავე თემაზე: 12 ქვეყანა მოუწოდებს იემენელ ამბოხებულებს, დაუყოვნებლივ შეწყვიტონ თავდასხმები წითელ ზღვაში