მოკლედ: სოციალური სამართლიანობის ცენტრი ბიჭვინთის აგარაკის რუსეთისთვის გადაცემას ანექსიური პროცესების გაგრძელებად აფასებს და მიიჩნევს, რომ აფხაზეთში მიმდინარე მოვლენები საქართველოსგან პოლიტიკის სისტემურ გადახედვას მოითხოვს.

  • როგორც მათ მიერ გავრცელებულ განცხადებაშია ნათქვამი, მაღალია რისკები, რომ ბიჭვინთის აგარაკის შემდეგ, რუსეთი გააგრძელებს აფხაზეთში ბუნებრივი რესურსებისა და უძრავი ქონების ათვისებას.
  • მომავალში კი ეს პოლიტიკა ათასობით აპარტამენტის მშენებლობასა და რუსეთის მოქალაქეებისათვის უძრავი ქონების საკუთრების უფლების მინიჭების საკითხსაც შეეხება.

რისი გაკეთება შეუძლია საქართველოს ხელისუფლებას: სოციალური სამართლიანობის ცენტრის აზრით, საქართველოს ხელისუფლებას არ აქვს ცხადი საპასუხო პოლიტიკა, რომელიც ერთის მხრივ, გააძლიერებდა საერთაშორისო საზოგადოების ინტერესს და ყურადღებას აფხაზეთის რეგიონში მიმდინარე პროცესების მიმართ, მეორეს მხრივ, კი აფხაზურ საზოგადოებას შესთავაზებდა ახალ სამშვიდობო ალტერნატივებს.

არასამთავრობო ორგანიზაცია მოუწოდებს ხელისუფლებას:

  • პარლამენტისა და საზოგადოების წინაშე წარმოადგინოს პოლიტიკის ხედვა, თუ როგორ აპირებს ის საერთაშორისო პოლიტიკური, დიპლომატიური და სამართლებრივი მექანიზმების გამოყენებას რუსეთის მიერ აფხაზეთში ბუნებრივი რესურსების, სტრატეგიული ობიექტებისა და უძრავი ქონების აპროპრიაციის განგრძობადი პოლიტიკის საპასუხოდ;
  • შეიმუშაოს კონფლიქტების ტრანსფორმაციაზე მიმართული ახალი სამშვიდობო პოლიტიკა, რომელიც უპასუხებს აფხაზურ საზოგადოებაში გაჩენილ შიშებს და უკმაყოფილებებს და რომელიც სხვა საკითხებთან ერთად, ევროპული ინტეგრაციის პროცესში მათ ახალ შესაძლებლობებს და პერსპექტივებს შესთავაზებს;
  • დეოკუპაციის, ასევე რუსეთთან ურთიერთობების თემაზე შექმნას ინკლუზიური სამუშაო და პოლიტიკური პროცესი;

ბოლო ხაზი: აფხაზეთის საოკუპაციო რეჟიმის "პარლამენტმა" გუშინ დაამტკიცა შეთანხმება რუსეთთან, რომელიც ბიჭვინთის აგარაკის რუსეთისთვის გადაცემას ითვალისწინებს.

ამავე თემაზე რა ხდება სოხუმში: ყველაფერი, რაც ბიჭვინთის აგარაკის რუსეთისთვის გადაცემის შესახებ ვიცით