თბილისის საქალაქო სასამართლომ თბილისის მერიის თანამშრომელს, ოთარ აბესაძეს, აღკვეთის ღონისძიების სახედ, პატიმრობა შეუფარდა. ქრთამის აღების ბრალდებული აბესაძის საქმეზე სასამართლოს ეს გადაწყვეტილება დღეს გახდა ცნობილი.

საქალაქო სასამართლომ ამ გადაწყვეტილებით, სრულად გაიზიარა ბრალდების მხარის შუამდგომლობა.

"სასამართლომ მიიჩნია, რომ სახეზეა აღკვეთის ღონისძიების გამოყენების როგორც ფაქტობრივი, ისე ფორმალური საფუძვლები, კერძოდ, ოთარ აბესაძეს ბრალად ედება მძიმე კატეგორიის დანაშაულის შესაძლო ჩადენა, რომელიც სასჯელის სახედ და ზომად ითვალისწინებს ექვსიდან ცხრა წლამდე თავისუფლების აღკვეთას. დანაშაულის დამტკიცების შემთხვევაში, მოსალოდნელი მკაცრი სასჯელის შიშით მიმალვის, დანაშაულებრივი საქმიანობის გაგრძელებისა და მოწმეებზე ზემოქმედების საფრთხეების გათვალისწინებით, სასამართლომ ბრალდებულს პატიმრობა შეუფარდა," - ასე განმარტა სასამართლომ გადაწყვეტილება.

დაცვის მხარეს მიაჩნია, რომ საქმის გადაკვალიფიცირება უნდა მოხდეს, რადგან გამოძიების დაწყების მომენტისთვის, 8 ივლისს აბესაძე თანამდებობის პირი არ იყო.

საქართველოს სახელმწიფო უსაფრთხოების სამსახურის ინფორმაციით, ქრთამის აღების ფაქტზე თბილისის მუნიციპალიტეტის მერიის თანამშრომელი - ოთარ აბესაძე 11 ივლისს დააკავეს.

სუს-ის ინფორმაციით, გამოძიებამ დაადგინა, რომ ოთარ აბესაძე მოქალაქეებს თბილისში, მდინარე მტკვარზე, ტივზე ინფრასტრუქტურის მოწყობისთვის საჭირო ნებართვების, სამი ათასი დოლარის სანაცვლოდ, აღებას დაჰპირდა.