თბილისის მერიის თანამშრომელს, ოთარ აბესაძეს, რომელიც საქართველოს სახელმწიფო უსაფრთხოების სამსახურმა გუშინ, ქრთამის აღების ბრალდებით დააკავა, დღეს ბრალი ოფიციალურად წარედგინა.

აბესაძის ადვოკატის განცხადებით, დაკავებული დუმილის უფლებას იყენებს.

სუს-ის ინფორმაციით, გამოძიებამ დაადგინა, რომ 2017 წლის მაისში ოთარ აბესაძე საქართველოს მოქალაქეებს თბილისში, მდინარე მტკვარზე, ტივზე არსებული კაფისა და შესაბამისი ინფრასტრუქტურის მოწყობისათვის საჭირო ნებართვების, თბილისის მერიის სხვადასხვა სამსახურებიდან დაჩქარებული წესით აღებაში დახმარებას დაჰპირდა, რის სანაცვლოდაც, ქრთამის სახით, 3 ათასი აშშ დოლარის გადახდა მოითხოვა.

გამოძიება ქრთამის აღების საქმეზე, საქართველოს სსკ-ის 338-ე მუხლის პირველი ნაწილით გათვალისწინებული დანაშაულის ნიშნებით, მიმდინარეობს. მსგავსი დანაშაულისთვის სასჯელის სახით ექვსიდან ცხრა წლამდე თავისუფლების აღკვეთაა გათვალისწინებული.

თბილისის მერიაში აცხადებენ, რომ ოთარ აბესაძე შტატგარეშე თანამშრომელი იყო, დავით ნარმანიას მოადგილე კი აცხადებს, რომ კანონის წინაშე ყველა თანასწორია. საქართველოს ახალგაზრდა იურისტთა ასოციაცია პოლიტიკოსებს უდანაშაულობის პრეზუმფციის დაცვისკენ მოუწოდებს.