თბილისის მერის მოადგილე, ირაკლი ლექვინაძე, სახელმწიფო უსაფრთხოების სამსახურის მიერ მათი თანამშრომლის, ოთარ აბესაძის დაკავებაზე ამბობს, რომ კანონის მიმართ ყველა თანასწორია. აბესაძე ქრთამის აღების ბრალდებით დააკავეს.

"ძალიან სამწუხარო ფაქტი, შეიძლება ითქვას, რომ მოულოდნელიც, ნებისმიერ შემთხვევაში გამოძიების შედეგებს უნდა დაველოდოთ და საბოლოო სიტყვას ალბათ გამოძიება იტყვის. მთლიანობაში, თბილისის მერიის მიდგომა არის ძალიან მარტივი, ნებისმიერი ფაქტზე, რომელიც უკავშირდება რაიმე გადაცდომას კანონთან მიმართებაში, შესაბამისი რეაგირება იქნება. არ აქვს მნიშვნელობა, რომელი მხარის წარმომადგენელი იქნება," - განუცხადა ლექვინაძემ რუსთავი 2-ს.

დღესვე თბილისის მერიამ აბესაძის დაკავების შესახებ განცხადება გაავრცელა. მერია აღნიშნავდა, რომ დაკავებული მერიის შტატგარეშე თანამშრომელი იყო.

საქართველოს სახელმწიფო უსაფრთხოების სამსახურის ინფორმაციით, ქრთამის აღების ფაქტზე თბილისის მუნიციპალიტეტის მერიის თანამშრომელი - ოთარ აბესაძე 11 ივლისს დააკავეს.

სუს-ის ინფორმაციით, გამოძიებამ დაადგინა, რომ ოთარ აბესაძე მოქალაქეებს თბილისში, მდინარე მტკვარზე, ტივზე ინფრასტრუქტურის მოწყობისთვის საჭირო ნებართვების, სამი ათასი დოლარის სანაცვლოდ, აღებას დაჰპირდა.