სასამართლომ ვაკის პარკის საქმეზე დაკავებული 2 პირი დამნაშავედ ცნო.

  • მერიის გარემოს დაცვის საქალაქო სამსახურის ყოფილ უფროსს, გიგა გიგაშვილს პატიმრობა 3 წლით მიესაჯა, ექსპერტ ვახტანგ ლონდარიძეს — 1 წლითა და 6 თვით.
  • გიგაშვილი სასამართლომ დამნაშავედ ცნო სამსახურებრივ გულგრილობაში, ლონდარიძეს კი — ყალბი ექსპერტიზის დასკვნის დამზადება-გამოყენებაში ედება ბრალი.

რა მოხდა ვაკის პარკში: 2022 წლის 12 ოქტომბერს თბილისის მერიამ პარკის შადრევანი საზეიმოდ გახსნა, 13 ოქტომბერს კი შადრევანში ჩასულ ბავშვებს დენმა დაარტყა.

  • 13 წლის მოზარდი გარდაიცვალა, ხოლო 2 ბავშვი დაშავდა.

ვისი პასუხისმგებლობა გამოიკვეთა: პარკის სარეაბილიტაციო სამუშაოებს კომპანია გრინსერვისი+ ასრულებდა, რომლის დამფუძნებლის, ლაშა ფურცხვანიძის წინააღმდეგ, 2013 წელს სამეწარმეო საქმიანობაში უკანონო მონაწილეობის და უკანონო შემოსავლის ლეგალიზაციის საქმეზე გამოძიება მიმდინარეობდა.

  • შადრევნის ოფიციალურად დოკუმენტაციაში წერია, რომ გრინსერვისი+-მა ჩააბარა, ხოლო მერიის გარემოს დაცვის საქალაქო სამსახურმა მიიღო მშენექსპერტის ინსპექტირების ანგარიშით დადასტურებული შადრევნისა და კასკადის სარეაბილიტაციო სამუშაოები — თუმცა უსაფრთხოების დასკვნა ნახსენები არ არის.
  • გამოძიების თანახმად, ლაშა ფურცხვანიძემ შესრულებული სამუშაო შესაბამისი ინსპექტირების ჩატარების გარეშე წარუდგინა მერიის საქალაქო სამსახურს, ხოლო გარემოს დაცვის სამსახურის უფროსის მოადგილემ მიიღო შესაბამისი ინსპექტირების გარეშე.
  • აღნიშნულ საქმეზე 9 ბრალდებული პირიდან თბილისის საქალაქო სასამართლომ დამნაშავედ 8 პირი ცნო, მათი საქმე ცალკე წარმოებად მიმდინარეობდა.
  • ლაშა ფურცხვანიძე ძველი თბილისის ყოფილი გამგებელია.
  • ის, უკანონო შემოსავლების ლეგალიზაციის გამო, 2013 წელს დააკავეს, მაგრამ ბრალი აღიარა და ჯარიმით გაათავისუფლეს.
  • ამის მიუხედავად, მისმა კომპანიამ მხოლოდ 2020 წელს, 5 ტენდერი მოიგო, უკონკურენტოდ.
  • 2013 წლამდე, ფურცხვანიძის "გრინსერვის +"-მა 8 მილიონ ლარამდე ღირებულების ტენდერები მოიგო.
  • მთლიანობაში კი, ფურცხვანიძის კომპანიას 2013 წლიდან, ტენდერების გზით, 41 მილიონზე მეტი ლარი აქვს მიღებული.
  • 2018 წელს "საერთაშორისო გამჭვირვალობა — საქართველო" მოითხოვდა, სახელმწიფო შესყიდვებში მონაწილეობის უფლება აღარ მისცემოდათ ნასამართლევ პირებს, მაგრამ მთავრობამ ეს მოთხოვნა უგულებელყო.